Дылма Русеф

Ды́лма Ва́на Русе́ф (парт.: Dilma Vana Rousseff; 14 снежня 1947, Белу-Арызонты) — бразільскі эканаміст і палітык, якая займала пасаду прэзідэнта Бразіліі з 2011 года да імпічменту і зняцця з пасады 31 жніўня 2016 года. Стала першай жанчынай, абранай на гэтую пасаду. Да гэтага, 3 2005 да 2010 года, узначальвала адміністрацыю прэзідэнта Луіса Інасіу Лулы да Сілвы.

Дылма Вана Русеф
парт.: Dilma Vana Rousseff
36-ы прэзідэнт Бразіліі 1 студзеня 2011 — 31 жніўня 2016
Віцэ-прэзідэнт	Мішэл Тэмер
Папярэднік	Луіс Інасіу Лула да Сілва
Пераемнік	Мішэл Тэмер
Кіраўнік адміністрацыі прэзідэнта Бразіліі 21 чэрвеня 2005 — 31 сакавіка 2010
Папярэднік	Жазэ Дырсеу
Пераемнік	Эрэнісі Гера
міністр энергетыкі Бразіліі 1 студзеня 2003 — 21 чэрвеня 2005
Папярэднік	Франсіску Луіс Сібут Гаміды
Пераемнік	Сілас Ронду
Нараджэнне	14 снежня 1947(1947-12-14) (73 гады) Белу-Арызонты, штат Мінас-Жэрайс, Бразілія
Імя пры нараджэнні	парт.-браз. Dilma Vana Rousseff
Бацька	Pedro Rousseff[d]
Маці	Dilma Jane da Silva[d]
Муж	разведзена
Дзеці	1 дачка
Веравызнанне	Каталіцкая Царква
Партыя	Партыя працоўных
Адукацыя	Федэральны ўніверсітэт Рыу-Гранды-ду-Сул[d] University of Campinas[d]
Прафесія	эканаміст
Дзейнасць	палітык, эканаміст
Аўтограф
Узнагароды	Bertha Lutz Prize[d] (2012) Вялікі ланцуг ордэна Сонца Перу[d] (4 лістапада 2013)
Сайт	Presidente Dilma (парт.)
Дылма Русеф на Вікісховішчы

Біяграфія

Нарадзілася ў сям’і балгарскага эмігранта і расла ва ўмовах сярэдняга класу ў Белу-Арызонты. У юнацтве стала прытрымлівацца сацыялістычных поглядаў і падчас дзяржаўнага перавароту 1964 года далучылася да левых і марксісцкіх гарадскіх партызанскіх атрадаў, якія змагаліся супраць ваеннай дыктатуры, у выніку чаго была захоплена, падвергнута катаванням і асуджана да турэмнага зняволення з 1970 да 1972 года.

Пасля вызвалення перабудавала сваё жыццё ў Порту-Алегры з Карласам Араухам, які быў яе мужам на працягу 30 гадоў. Абодва ўдзельнічалі ў заснаванні Дэмакратычнай рабочай партыі ў Рыу-Гранды-ду-Сул і прымалі ўдзел ў некалькіх выбарчых кампаніях партыі. Займала пасады сакратара казначэйства горада Порту-Алегры, а пазней міністра энергетыкі штата Рыу-Гранды-ду-Сул. У 2000 годзе пасля ўнутранай спрэчкі ў адміністрацыі Алівіі Дутры пакінула Дэмакратычную рабочую партыю і прыядналася да Партыі рабочых.

У 2002 годзе ўвайшла ў склад камітэта адказнага за энергетычную палітыку кандыдата ў прэзідэнты Луіса Інасіу Лулы да Сілвы, які пасля перамогі на выбарах прапанаваў ёй заняць пасаду міністра энергетыкі Бразіліі. У 2005 годзе, пасля палітычнага крызісу, які быў справакаваны скандалам Менсалаа і прывёў да адстаўкі кіраўніка адміністрацыі Хасэ Дырсэу, заняла яго пасаду і знаходзілася на ёй да 31 сакавіка 2010 года, калі стала балатавацца ў прэзідэнты. 31 кастрычніка 2010 года стала прэзідэнтам краіны, перамогшы на выбарах кандыдата ад Бразільскай сацыял-дэмакратычнай партыі Жазэ Серу, а 26 кастрычніка 2014 года была пераабраная на другі тэрмін, таксама перамогшы кандыдата ад сацыял-дэмакратаў Аэсію Невеса.

У канцы 2015 года супраць яе быў распачаты працэс імпічменту. Ёй былі прад’яўлены абвінавачванні ў парушэнні бюджэтнага заканадаўства. 3 снежня 2015 года імпічмент быў афіцыйна прыняты Палатай дэпутатаў, а 12 мая 2016 года Сенат часова прыпыніў паўнамоцтвы прэзідэнта на 6 месяцаў да абвяшчэння вердыкту. Падчас перапынку віцэ-прэзідэнт Мішэл Тэмер стаў выконваючым абавязкі прэзідэнта Бразіліі, а 31 жніўня 2016 года Сенат прагаласаваў на карысць імпічменту.

Спасылкі

• На Вікісховішчы ёсць медыяфайлы па тэме Дылма Русеф

Палітычныя пасады
Папярэднік: Луіс Інасіу Лула да Сілва	Прэзідэнт Бразіліі 2011 — 2016	Пераемнік: Мішэл Тэмер