Жалобны какаду Бэнкса (Calyptorhynchus banksii, сін. Calyptorhynchus magnificus) — птушка сямейства какаду. Адна з ранніх птушак, апісаная еўрапейцамі на аўстралійскім кантыненце, названая ў гонар англійскага натураліста сэра Джозефа Бэнкса (1743—1820), які суправаджаў Джэймса Кука ў яго першым кругасветным падарожжы. Як і іншыя прадстаўнікі роду жалобных какаду, вылучаецца пераважна чорнай афарбоўкай апярэння. У самца пёры хваста з шырокай чырвонай паласой пасярэдзіне, у самкі вялікая колькасць жоўта-аранжавых крапін на галаве, шыі і крылах, а таксама бледна-жоўтая махра ў верхняй частцы бруха.
Засяляе разнастайныя дрэвавыя ландшафты, у тым ліку эўкаліптавыя лясы розных тыпаў, рэдкалессі, хмызняковыя зараснікі, саванны. Трымаецца парамі або групамі, колькасць асобін у якіх вагаецца ад некалькіх адзінак да некалькіх соцень. Сілкуецца насеннем, арэхамі, сакавітымі пладамі, насякомымі і іх лічынкамі. На поўначы арэала пераследуецца фермерамі, якія лічаць птушку сельскагаспадарчым шкоднікам. Кормяцца ў кроне дрэў, часам на зямлі. Гняздуецца ў дуплах эўкаліптаў і іншых дрэў, аддае перавагу асобна стаячым пасадкам. Глыбіня гнязда да 2 м. Гняздо высцілае пацярухай. У кладцы 1-2 яйкі; выседжвае толькі самка на працягу 28-32 дзён, у той час як самец яе корміць. Птушаняты пакрытыя густым жоўтым пухам, апярэнне з’яўляецца ва ўзросце 10-12 тыдняў.
Прыродная колькасць какаду паступова памяншаецца, некаторым падвідам пагражае небяспека знікнення. Стан Міжнародным саюзам аховы прыроды ацэньваецца як паспяховы. Міжнародны гандаль і ўтрыманне птушкі абмежавана шэрагам заканадаўчых актаў — гэтая прычына, а таксама асаблівыя патрабаванні да ўтрымання і бясплоднасць многіх вырашчаных у няволі самцоў робіць птушку рэдкім хатнім гадаванцам.
.jpg)
