Коханаўская сярэдняя школа імя І. П. Кожара

Дзяржаўная ўстанова адукацыі «Коханаўская сярэдняя школа імя І. П. Кожара» — установа сярэдняй адукацыі ў гарадскім пасёлку Коханава Талачынскага раёна Віцебскай вобласці.

ДУА «Коханаўская сярэдняя школа імя І. П. Кожара Талачынскага раёна»
Заснавана	1868
Тып	дзяржаўная ўстанова адукацыі
Адрас	Віцебская вобласць, Талачынскі раён, г. п. Коханава, вуліца Камунальная, 10.
Сайт	kokhanovo.tolochin.edu.by

Гісторыя

Стары будынак школы

Коханаўская сярэдняя школа існуе з 1868 года. Была адкрыта ў доме валаснога праўлення як аднакласнае народнае вучылішча.

1 студзеня 1869 года тут вучыліся 29 хлопчыкаў, у 1876 годзе — 37 хлопчыкаў і 4 дзяўчынкі, у 1898—1899 гадах — 124 хлопчыкі і 22 дзяўчынкі. З 1904 года вучылішча стала двухкласным. Яно мела кавальскую, сталярную і слясарную майстэрні.

Пасля Кастрычніцай рэвалюцыі называлася школай 1-й, 2-й ступеняў, з 1928 года — сямігадовай, з 1932 года — сярэдняй. У 1925—1927 гадах быў узведзены 2-павярховы будынак школы.

У час Вялікай Айчыннай вайны школьны будынак быў спалены, уся школьная маёмасць разрабавана і знішчана. Да 1944 года школу аднавілі.

У 1971 годзе пастаўлены новы шматпавярховы будынак школы.

У 2003 годзе школа стала ўдзельніцай міжнароднай канферэнцыі па ўкараненні інавацыйных тэхналогій. У тым жа годзе, да 135-годдзя школы, у падарунак ад абласнога ўпраўлення адукацыі ў ёй адчыніўся камп’ютарны клас.

У 2003 годзе быў адкрыты абноўлены школьны музей. Быў створаны школьны зімовы сад.

У Коханаўскай школе створана безбар’ернае асяроддзе для арганізацыі адукацыйнага працэсу вучняў з абмежаванымі магчымасцямі.

На будынку Коханаўскай школы ўсталяваны мемарыяльныя пліты былым вучням — А. М. Алюшыну, І. Батраку, І. П. Кожару, М. А. Савіцкаму.

Вядомыя выпускнікі

• Іван Батрак (1892—1932) — рускі паэт, публіцыст, перакладчык.
• Ілья Паўлавіч Кожар (1902—1967) — савецкі ваенны дзеяч, Герой Савецкага Саюза.
• Фёдар Яфрэмавіч Макавецкі (1899—1974) — Герой Савецкага Саюза.
• Алесь Петрашкевіч (1930—2012) — беларускі пісьменнік, драматург.
• Міхаіл Андрэевіч Савіцкі (1922—2010) — беларускі мастак, Герой Беларусі.
• Пётр Фёдаравіч Сычэнка (1911—1969) — савецкі ваенны лётчык, Герой Савецкага Саюза.
• Яўген Міхайлавіч Целешаў (1923—1997) — Герой Савецкага Саюза.

Дырэктары школы

• Шарай Аляксандр Міхайлавіч (1954—?).

Выкладчыкі

• Таццяна Іванаўна Радзькова (1974—2000) — заслужаны работнік асветы БССР.

Спасылкі

• Бірукоў, В. Адсюль вытокі шляху ў жыццё / В. Бірукоў // Наша Талачыншчына. — 2018. — 14 лістап. — С. 1-2.
• Бірукоў, В. Усім сэрцам любімая школа / В. Бірукоў // Наша Талачыншчына. — 2004. — 14 лют. — С. 2.
• Бирюков, В. Идет подготовка к юбилею / В. Бирюков // Наша Талачыншчына. — 2018. — 22 снеж. — С. 4.
• Путь длиною в 150 лет // Наша Талачыншчына. — 2018. — 8 снеж. — С. 3.
• Серада, А. Коханаўская СШ: вопыт у рэалізацыі інавацыйных праектаў / А. Серада // Наша Талачыншчына. — 2017. — 30 верас. — С. 4.
• Серада, А. Тут працуюць і выхоўваюць з поўнай аддачай / А. Серада // Наша Талачыншчына. — 2009. — 21 кастр. — С. 7.
• Середа, Е. На пути к познанию окружающего мира / Е. Середа // Наша Талачыншчына. — 2017. — 25 лістап. — С. 4.