Свята-Троіцкая царква (Арэхаўск)

Свята-Троіцкая царква — праваслаўная царква, размешчана ў цэнтры г. п. Арэхаўск, у невялікім скверы. Пабудавана ў 1838 г. з дрэва. Рэстаўрыравана ў 1990-х гг.

Праваслаўны храм
Свята-Троіцкая царква
54°41′37″ пн. ш. 30°29′57″ у. д.
Краіна	Беларусь
Гарадскі пасёлак	Арэхаўск
Канфесія	Беларуская праваслаўная царква
Епархія	Віцебская і Аршанская
Архітэктурны стыль	класіцызм
Дата пабудовы	1838 год
Статус	Гісторыка-культурная каштоўнасць Беларусі, шыфр 213Г000126
Медыяфайлы на Вікісховішчы

Архітэктура

Помнік архітэктуры позняга класіцызму. У аснове аб'ёмна-прасторавай кампазіцыі кубападобны аб'ём, накрыты паўсферычным купалам на нізкім, шырокім цыліндрычным барабане. Па восі ўсход—захад далучаны вузкі прытвор пад 2-схільным дахам і паўкруглая апсіда са сферычным пакрыццем. Вертыкальна ашаляваныя фасады прарэзаны паўкруглымі вокнамі-люкарнамі.

Інтэр'ер

Іканастас

Малітоўная зала расчлянена 4 падпружнымі аркамі. Барабан над залай вылучаны масіўным карнізам і нізкім атыкам, апсіда перакрыта конхай і вылучана аркай на 2 іанічных калонах. У інтэр'еры 1-ярусны драўляны іканастас. Сцены ўнутры атынкаваны і імітаваны пад мураваныя. Над уваходам на каваных кранштэйнах размешчаны драўляныя хоры з бакавымі вітымі сходамі.

Званіца

Перад храмам асобна пастаўлена драўляная званіца, якая складае з царквой адзіны ансамбль. 2-ярусная 4-гранная пабудова накрыта гранёным шатром, акаймаваным унізе франтончыкам.

Літаратура

• Царква ў гонар Святой Троіцы // Кулагін, А. М. Праваслаўныя храмы Беларусі : энцыклапедычны даведнік / А. М. Кулагін. — Мн., 2007. — С. 20-21.
• Свята-Троіцкая царква // Памяць. Орша і Аршанскі раён: гісторыка-дакументальная хроніка гарадоў і раёнаў Беларусі : у 2 кн. / рэдкал.: Г. П. Пашкоў [і інш.]. — Мн., 2000. — Кн. 2. — С. 464.
• Спаская царква // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. — Мн., 1985. — С. 100.

Спасылкі

• Свята-Троіцкая царква (Арэхаўск) на сайце Праваслаўная архітэктура Беларусі (бел.)
• Свята-Троіцкая царква (Арэхаўск) на сайце Глобус Беларусі (руск.)
• Свята-Троіцкая царква (Арэхаўск) на сайце Radzima.org
• Свята-Троіцкая царква (Арэхаўск) на сайце «Архіварта»