Іван Зігфрыдан

Іван (Іаган) Зігфрыдан — беларускі архітэктар XVIII стагоддзя. З 1772 года губернскі архітэктар Полацкай, з 1796 Віцебскай, з 1799 года Беларускай губерняў.

Іван Зігфрыдан
Працы і дасягненні
Працаваў у гарадах	Віцебск, Полацк
Архітэктурны стыль	барока і класіцызм
Горадабудаўнічыя праекты	Полацк

Творчасць

Яго творчасць была пераходнай ад барока да класіцызму. Асноўныя работы: палац віцэ-губернатара і дом каменданта ў Віцебску (абодва 1780; не захаваліся); у Полацку — комплекс жылых і адміністрацыйных будынкаў на галоўнай плошчы (1783—1786) і план-чарцёж горада (1793). Яго тыпавыя праекты казённых дамоў (суд, магістрат, магазіны) у 1780—1795 сфарміравалі ансамблі цэнтраў Дрысы (цяпер г. Верхнядзвінск), Рэжыцы (цяпер г. Рэзэкнэ, Латвія), Гарадка і інш. Пабудовы, створаныя ім, вылучаюцца манументальнасцю і рацыянальнасцю планіровачных вырашэнняў.

Горадабудаўнічыя праекты

Полацк. Праект перапланіроўкі 1793 г. Архітэктар І. Зігфрыдан

У 1776—1784 гадах галоўная плошча Полацка была забудаваная жылымі і адміністрацыйнымі будынкамі ў стылі класіцызму паводле праекту I. Зігфрыдана.

Асобныя пабудовы

• Палац віцэ-губернатара ў Віцебску
• Дом каменданта ў Віцебску
• Правіянцкія крамы ў Полацку
• Палац генерал-губернатара ў Полацку

Літаратура

• Беларуская энцыклапедыя: У 18 т. Т. 7: Застаўка — Кантата / Рэдкал.: Г. П. Пашкоў і інш. — Мн. : БелЭн, 1998. — Т. 7. — 604 с. — 10 000 экз. — ISBN 985-11-0035-8. — ISBN 985-11-0130-3 (т. 7).
• Энцыклапедыя літаратуры і мастацтва Беларусі: У 5-і т. Т. 2. Габой — Карціна / Рэдкал.: І. П. Шамякін (гал. рэд.) і інш. — Мн.: БелСЭ, 1985. — С. 528. — 702 с. — 9500 экз.