Вікіпедыя

Андрэй Мікалаевіч Казакевіч

У Вікіпедыі ёсць артыкулы пра іншых людзей з прозвішчам Казакевіч.

Андрэй Мікалаевіч Казакевіч (англ.: Andrei Kazakevich; нар. 31 студзеня 1980, Мінск, Беларуская ССР) — беларускі палітолаг, доктар палітычных навук. Дырэктар Інстытута палітычных даследаванняў «Палітычная сфера»[1], заснавальнік і старшыня Арганізацыйнага камітэта Міжнароднага кангрэса даследчыкаў Беларусі[2][3], галоўны рэдактар часопісаў «Палітычная сфера»[4] і «Belarusian Political Science Review»[2][5], аўтар Youtube-канала «Казакевіч. Палітыка»[6].

Андрэй Мікалаевіч Казакевіч
Дата нараджэння 31 студзеня 1980(1980-01-31) (44 гады)
Месца нараджэння
Грамадзянства
Род дзейнасці палітолаг
Месца працы
Навуковая ступень доктар палітычных навук
Альма-матар
Вядомы як палітолаг, аналітык
Сайт Інстытут палітычных даследаванняў «Палітычная сфера»

Біяграфія

правіць

Адукацыя

правіць

У 1997—2002 гадах вучыўся на аддзяленні паліталогіі юрыдычнага факультэта Беларускага дзяржаўнага ўніверсітэта па спецыяльнасці «Юрыст-палітолаг»[2]. Потым, у 2002—2005 гадах вучыўся ў аспірантуры таго ж факультэта[2].

У 2009 годзе атрымаў ступень доктара палітычных навук (PhD in Political Science) ва Універсітэце Вітаўта Вялікага ў Каўнасе (Літва)[2]. Тэма доктарскай дысертацыі: судовая ўлада ў палітычнай сістэме Рэспублікі Беларусь[2][7].

Прафесійная дзейнасць

правіць

У сферы палітычных даследаванняў пачаў працаваць на пачатку 2000-х гадоў. Сярод прафесійных інтарэсаў — знешняя палітыка Беларусі, развіццё палітычных інстытутаў і палітычнай гісторыі Беларусі і краін Усходняй Еўропы, гісторыя палітычных ідэй, судовая ўлада, знешняя палітыка, палітычнае развіццё СССР перыяду позняй Перабудовы (1988—1991)[8][7].

Андрэй Казакевіч — адзін з заснавальнікаў часопіса палітычных даследаванняў «Палітычная сфера»[4] (Мінск, ISSN 1819-3625), з 2003 года займае пасаду галоўнага рэдактара часопіса[2]. Часопіс публікуе навуковыя даследаванні з розных галін палітычнай навукі і сумежных дысцыплін. Мэтай выдання з’яўляецца задавальненне патрэб шырокай акадэмічнай супольнасці ў публікацыі вынікаў тэарэтычнай і эмпірычнай навуковай дзейнасці. Хоць ніякіх заяву пра закрыццё часопіса не было, фактычна ён не выдаецца з 2016 года[4].

У 2006—2009 гадах займаў пасаду дырэктара бакалаўрскай праграмы «Паліталогія і еўрапейскія даследаванні» Еўрапейскага гуманітарнага ўніверсітэта (Вільня, Літва)[2][9], аднак у 2009 годзе разам з іншымі маладымі выкладчыкамі ўніверсітэта прыняў удзел у страйку[10] і сышоў з універсітэта ў знак пратэсту супраць парушэння кіраўніцтвам універсітэта акадэмічных свабод[9].

Пасля зыходу з Еўрапейскага гуманітарнага ўніверсітэта Андрэй Казакевіч у 2009 годзе стаў сузаснавальнікам і ўзначаліў Інстытут палітычных даследаванняў «Палітычная сфера» — беларускую даследчую і экспертную ўстанову, асновай якой стала група маладых даследчыкаў, якую аб’яднаў заснаваны раней часопіс «Палітычная сфера». Акрамя Казакевіча, заснавальнікамі інстытута таксама былі Андрэй Асадчы, Дзяніс Мельянцоў, Андрэй Ягораў, Аляксей Ластоўскі і іншыя. Галоўнымі мэтамі дзейнасці інстытута былі анансаваныя інтэграцыя беларускіх навукоўцаў у міжнародную акадэмічную супольнасць, фарміраванне прафесійнай супольнасці даследчыкаў палітыкі ў Беларусі, мадэрнізацыя выкладання палітычных дысцыплін[1]. Асноўнымі напрамкамі дзейнасці Інстытута з’яўляюцца даследаванні і экспертная дзейнасць, выдавецкая дзейнасць і арганізацыя публічных мерапрыемстваў. У межах інстытута Андрэй Казакевіч як галоўны рэдактар працягнуў выдаваць часопіс «Палітычная сфера», а ў 2010 годзе заснаваў штогоднік «Belarusian Political Science Review» і таксама стаў яго галоўным рэдактарам[2].

У 2010 годзе Казакевіч стаў адным з заснавальнікаў міжнароднага Кангрэса даследчыкаў Беларусі — штогадовага акадэмічнага і экспертнага форума даследчыкаў Беларусі, у якім прымаюць удзел больш за 500 даследчыкаў, аналітыкаў, журналістаў і грамадскіх дзеячаў. Ініцыятарамі стварэння Кангрэса таксама выступілі прадстаўнікі беларускай і літоўскай акадэмічных супольнасцяў, у прыватнасці, Інстытут «Палітычная сфера», Інстытут Вялікага Княства Літоўскага[11][12]. З моманту стварэння Кангрэса Андрэй Казакевіч займае пасаду старшыні арганізацыйнага камітэта[2], таксама да аргкамітэта ў залежнасці ад сітуацыі і месца правядзення Кангрэса далучаюцца розныя беларускія, літоўскія, польскія арганізацыі[11]. Як казаў Казакевіч, галоўнымі мэтамі Кангрэса з’яўляюцца стварэнне прасторы для акадэмічнай камунікацыі тых, хто прафесійна займаецца Беларуссю, а таксама імкненне зрабіць беларускую экспертную супольнасць больш згуртаванай[13]. Пасля другога Кангрэсу ў 2012 годзе арганізацыйны камітэт заснаваў штогадовую прэмію за найлепшую навуковую публікацыю пра Беларусь у галіне сацыяльных і гуманітарных навук[14]. «Цяпер гуманітарныя дысцыпліны знаходзяцца ў складаным становішчы. Наша задача павысіць цікавасць да гуманітарных навук, садзейнічаць папулярызацыі і палепшыць якасць публікацый», — тлумачыў неабходнасць заснавання прэміі Андрэй Казакевіч[14].

З 2012 года Казакевіч з’яўляецца старшым навуковым супрацоўнікам (Research Fellow) Універсітэта Вітаўта Вялікага[2]. Таксама некалькі год выкладаў у Лятучым ўніверсітэце, чытаў курс «Уводзіны ў сучасную еўрапейскую палітыку» ў Беларускім калегіюме[15].

У 2021 годзе стварыў Youtube-канал «Казакевіч. Палітыка»[6], дзе ён размяшчае кароткія відэа з тлумачэннем актуальных тэм ва ўнутранай і знешняй палітыцы Беларусі, а таксама публікуе інтэрв’ю з гісторыкамі ў межах рубрыкі «Няпростая гісторыя»[6].

Акрамя таго, Андрэй Казакевіч рэгулярна каментуе падзеі вакол Беларусі, дае інтэрв’ю беларускім і замежнымі медыя па пытаннях беларускай палітыкі. Таксама з’яўляўся пастаянным аўтарам часопісаў «Белорусский ежегодник», «Arche», «Палітычная сфера» і інш.

У 2024 годзе завочна асуджаны ў Беларусі да 10 гадоў пазбаўлення волі па справе «аналітыкаў Святланы Ціханоўскай»[16].

Бібліяграфія

правіць

Андрэй Казакевіч з’яўляецца аўтарам і суаўтарам вялікай колькасці палітычных даследаванняў, навуковых артыкулаў, публікацый і аналітычных распрацовак па тэме палітычнага развіцця Беларусі. Ніжэй прыведзены некаторыя з яго публікацый:

Крыніцы

правіць
  1. ↑ а б Прэзентаваны Інстытут палітычных даследаванняў «Палітычная сфера». Наша Ніва.
  2. ↑ а б в г д е ё ж з і к Казакевич Андрей Архівавана 29 студзеня 2023. | ThinkTanks.BY. thinktanks.by. Дата обращения: 29 января 2023.
  3. ↑ Чаму сёлета Кангрэс даследчыкаў Беларусі пройдзе ў Варшаве, а не Каўнасе? Тлумачыць Казакевіч. Наша Ніва.
  4. ↑ а б в Часопіс «Палiтычная сфера» — Інстытут палітычных даследаванняў «Палiтычная сфера». palityka.org. Дата обращения: 29 января 2023.
  5. ↑ Андрей Казакевич (белор.). Беларускі інстытут стратэгічных даследаванняў. Дата обращения: 29 января 2023.
  6. ↑ а б в Казакевич. Политика — YouTube. www.youtube.com. Дата обращения: 29 января 2023.
  7. ↑ а б Andrei Kazakevich | Wilson Center. www.wilsoncenter.org.
  8. ↑ Андрей Казакевич (руск.). Наше Мнение.
  9. ↑ а б Мельянцоў: «У ЕГУ маюць месца праявы аўтарытарызму». Наша Ніва.
  10. ↑ Выкладчыкі паліталёгіі ЭГУ абвесьцілі страйк. Радыё Свабода.
  11. ↑ а б Міжнародны кангрэс даследчыкаў Беларусі . ICBS.
  12. ↑ Міжнародны кангрэс даследчыкаў Беларусі ўпершыню пройдзе ў Варшаве. Наша Ніва.
  13. ↑ В Каунасе открылся конгресс исследователей Беларуси (руск.). Deutsche Welle (28 верасня 2012).
  14. ↑ а б Кангрэс даследчыкаў Беларусі заснаваў навуковую прэмію . Наша Ніва.
  15. ↑ Андрэй Казакевіч – Беларускі Калегіюм.
  16. ↑ 20 «аналітыкам Ціханоўскай» прысудзілі гіганцкія завочныя тэрміны. Больш за ўсіх — Дабравольскаму. Наша Ніва (1 ліпеня 2024).

Спасылкі

правіць
Узята з "https://be.wikipedia.org/w/index.php?title=Андрэй_Мікалаевіч_Казакевіч&oldid=4848379"