Свята-Мікалаеўская царква (Бабруйск)

Свята-Мікалаеўскі сабор — праваслаўная царква ў Бабруйску, кафедральны сабор Бабруйскай і Быхаўскай епархіі.

Праваслаўны храм
Свята-Мікалаеўская царква
Свята-Мікалаеўская царква
53°08′19,41″ пн. ш. 29°13′31,67″ у. д.
Краіна	Беларусь
Горад	Бабруйск
Канфесія	Руская праваслаўная царква
Епархія	Бабруйская і Быхаўская
Архітэктурны стыль	псеўдарускі стыль
Будаўніцтва	1892—1894 гады
Матэрыял	цэгла
Стан	дзейнічае
Сайт	snsobor.by
Медыяфайлы на Вікісховішчы

Гісторыя

Першыя ўзгадкі пра царкву тычацца XVI ст. Неўзабаве пасля падпісання ў 1596 Берасцейскай уніі царква стала ўніяцкай, якой заставалася да Другога падзелу Рэчы Паспалітай, калі ў 1795 расійскімі ўладамі яна была зноў перароблена пад праваслаўную.

Да 1812 царква знаходзілася каля ракі Бярэзіна. Але ў сувязі з будаўніцтвам Бабруйскай крэпасці царква была перанесена на Парыцкі фарштат, адкуль у 1829 яе перанеслі на Мінскі фарштат. У 1835 быў узведзены новы драўляны будынак царквы. На месцы ж першапачатковага знаходжання царквы была пабудавана Рагачоўская брама крэпасці.

У 1879 да прыходу царквы належалі жыхары Бабруйска з фарштатамі і хутарамі, вёскі Арновічы, Пісчакі, Канчаны, Думаноўшчына, Ясны Лес, Вялічкава, Даманава. Агульная колькасць прыхаджан была 2069 мужчын і 2055 жанчын. Протаіерэем царквы быў Фёдар Смоліч, дапаможным святаром быў Іосіф Яхімовіч. Пры царкве была прыходскае вучылішча з жаночай зменай.

У 1892—1894 быў пабудаваны новы каменны будынак царквы. Да царквы належалі: Свята-Георгіеўская царква, Думаноўшчына, Свята-Мікалаеўская царква, хутар Лукі, збудаваная ў 1826; Сафійская царква, Свята-Духаўская царква (1901), капліцы ў вёсцы Ясны Лес.

За савецкім часам царква была зачынена, але аднавіла сваю дзейнасць падчас ВАВ. На прылеглай да цэрквы тэрыторыі былі зроблены нямецкія могілкі. У 1964 царква была закрыта, а яе будынак быў перароблены пад басейн. 1 жніўня 2003 увесь будынак царквы перадалі вернікам. Адначасова пачалося яе аднаўленне.

Сучасны стан

У царкве два прастолы: першы асвячоны іерэйскім чынам у 2001, 2-і ў 2007 архірэйскім чынам. Пры царкве маюцца нядзельная школа, сястрыцтва, казацтва, бібліятэка. Клірыкі — плябан протаіерэй Аляксандр Палуянаў, іерэй Міхаіл Пракоф’еў, іерэй Аляксей Болатаў, іерэй Віктар Смычнік, іераманах Сяргей Брыч, іерэй Максім Кірэяў, дыякан Максім Ульяшын.

Спасылкі

• Інфармацыя на сайце епархіі
• [1] Архівавана 21 ліпеня 2013.
• Свята-Мікалаеўская царква (Бабруйск) на сайце Глобус Беларусі (руск.)
• Свята-Мікалаеўская царква (Бабруйск) на сайце Radzima.org
• Свята-Мікалаеўская царква (Бабруйск) на сайце Праваслаўная архітэктура Беларусі (бел.)