Дом па Ленінскай вуліцы, 5а (Магілёў)

Дом па Ленінскай вуліцы, 5а — будынак у гістарычным цэнтры Магілёва. Помнік жылой архітэктуры класіцызму. Размешчаны ў двары дамоў № 1—7, за гарадской ратушай.

Славутасць
Дом па Ленінскай вуліцы, 5а
53°53′41″ пн. ш. 30°19′56″ у. д.
Краіна	Беларусь
Горад	Магілёў
Архітэктурны стыль	класіцызм
Будаўніцтва	канец XVIII — пачатак XIX
Статус	Гісторыка-культурная каштоўнасць Беларусі, шыфр 513Е000001
Медыяфайлы на Вікісховішчы

Гісторыя

Пабудаваны ў канцы XVIII — пачатку XIX ст. з цэглы як жылы дом.

У наш час з боку Дняпра да будынка прыбудаваны жылы дом па адрасе вуліца Архірэйскі Вал Каніскага, 7.

У 2017 годзе тарэц будынка быў упрыгожаны муралам, створаным мастаком Рыгорам Шараевым. Праект быў прапанаваны ў гонар 750-годдзя Магілёва адным з прадпрымальнікаў, які пражывае ў доме каля ратушы, ён жа і выступіў спонсарам стварэння роспісу. Малюнак складаецца з герба Магілёва, выяў майстроў — шкловыдзімальніка і ганчара, а таксама найстаражытнай захаванай выявы горада з гравюры 1702 года і арнаменту са старонак старадаўніх магілёўскіх кніг.

У будынку пасля завяршэння рамонту ў 2018 годзе будзе размешчана экспазіцыя і сховішча фондаў гарадскога гістарычнага музея.

Архітэктура

Дом № 5а уяўляе сабой прамавугольны ў плане двухпавярховы будынак з падвалам. Вуглавая плоскасць паміж фасадамі, арыентаванымі ў бок Дняпра і плошчы Славы, скошана. Гладкія сцены прарэзаны прамавугольнымі аконнымі праёмамі ў простых ліштвах. Паверхі падзяляе карнізны пояс, сцены завершаны развітым прафіляваным карнізам. Унутраная планіроўка анфіладнага тыпу.

Заўвагі

Зноскі

Літаратура

• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1986. — Магілёўская вобласць. — 408 с., іл.

Спасылкі

• На Вікісховішчы ёсць медыяфайлы па тэме Дом па Ленінскай вуліцы, 5а (Магілёў)