Белахвосты жалобны какаду (Calyptorhynchus (Zanda) latirostris) — птушка сямейства какаду, эндэмік Аўстраліі.
Адзін з найбуйнейшых прадстаўнікоў сямейства: даўжыня — 54-56 см, размах крылаў — каля 110 см, маса — 520—790 г. Асноўная афарбоўка апярэння чорная з хвалепадобным струменевым малюнкам жаўтлява-белага колеру, які ўтвараецца за кошт светлых пёравых аблямоўак; каля шыі і на грудзях гэтыя аблямоўкі шырэйшыя.
На патыліцы — чубок даўжынёй 2,5—3 см, які ўзбуджаная птушка распускае веерам. На шчоках — вялікія жаўтлява-белыя плямы. Крайнія рулявыя пёры жаўтлява-белыя з шырокім чорным полем па краі, цэнтральныя пёры хваста — цалкам чорныя. Радужка цёмна-карычневая, ногі карычнявата-шэрыя.
Палавы дымарфізм добра развіты. Найбольш прыкметныя адрозненні праяўляюцца ў афарбоўцы дзюбы і аголенай скуры вакол вачэй: у самца дзюба цёмна-шэрая і кольцы каля вачэй ружовыя, у самкі дзюба гліністага колеру і кольцы блакітна-шэрыя. Адрозненні і ў малюнку апярэння: у самак плямы па баках галавы больш светлыя і маюць выразную мяжу, светлыя стракаціны на грудзях і бруху шырэйшыя, утвараюць суцэльныя папярочныя лініі. Ногі ў самак таксама афарбаваны ў больш светлыя колеры. Лінька працягваецца са студзеня-лютага па красавік-травень, чаргаргавальнасць змены пер’евага покрыва вывучана слаба.
У маладых птушак абодвух полаў, як і дарослых самак, дзюбу афарбаваны ў гліністы колер, кольцы вакол вачэй шэрыя, афарбоўка апярэння з меншым развіццём белых стракацін. Іх таксама можна адрозніць па характэрных просьбітных крыках. Вонкавыя палавыя прыкметы самцоў пачынаюць выяўляцца ў канцы першага года жыцця і цалкам набываюць дарослы выгляд у двухгадовым узросце.
