Касцёл Святога Лаўрэна (Ушачы)

Касцёл Святога Лаўрэна — каталіцкі храм у г.п. Ушачы Віцебскай вобласці.

Славутасць
Касцёл Святога Лаўрэна
55°10′39″ пн. ш. 28°36′44″ у. д.
Краіна	Беларусь
Месцазнаходжанне	Ушачы
Канфесія	каталіцтва
Епархія	Віцебская дыяцэзія
Архітэктурны стыль	неаготыка
Будаўніцтва	1913
Статус	Гісторыка-культурная каштоўнасць Беларусі, шыфр 213Г000951
Медыяфайлы на Вікісховішчы

Гісторыя

Будаўніцтва касцёла ў 1913 годзе

У 1716 г. падваявода полацкі Геранім Жаба разам з жонкай заснавалі касцёл і кляштар дамініканцаў. У 1787 г. манахі-дамініканцы ўзвялі 2-павярховы мураваны кляштар, заклалі 6-класную школу-вучылішча (дзейнічала да 1839). Інтэр’ер храма быў распісаны фрэскамі адным з ксяндзоў-дамініканцаў. У 1863 г. касцел і кляштар закрыты, будынкі часткова разбураны, усё літургічнае начынне перанесена ў касцёл в. Селішча. Энергічныя намаганні парафіян (каля 1600 чалавек) па вяртанню касцёла пачалі здзяйсняцца з 1905 г. пасля прыняцця ўрадам талерантнага закона, але не далі жадаемых вынікаў. Быў атрыманы дазвол на будаўніцтва новага храма (пачата ў 1908 г.). Сродкі вылучаны Рэутам (14 тыс. руб.), Івашэўскай, а таксама ўладамі (9 тыс. руб.). Будаўніцтва закончана ў 1913 г.

Касцёл з вежамі ў 1920-я гг.

Перад рэвалюцыяй 1917 г. у парафіі налічвалася 1600 вернікаў. Пасля рэвалюцыі на працягу некаторага часу ў мястэчка прыязджаў адпраўляць св. Імшу ксёндз з Лепеля. Закрыты храм быў у 1932 годзе.

У 1994 г. парафія св. Лаўрэнція адрадзілася. У 2001 г. ва Ушачах быў прызначаны пастаянны пробашч і перададзена пляцоўка з касцёлам, які пачалі аднаўляць. 24 кастрычніка 2004 г. біскуп Віцебскай дыяцэзіі Уладзіслаў Блін урачыста асвяціў адбудаваную святыню.

Архітэктура

Архітэктура мураванага храма вырашана ў стылі неаготыкі. Адносіцца да тыпу 2-вежавых 1-нефавых храмаў з 3-граннай апсідай. Гатычны характар будынку надаюць высокія стральчатыя аконныя праёмы, ступеньчатыя контрфорсы, аркатурны фрыз, фіялы.

Інтэр’ер

Вельмі шанаваўся маляваны на палатне абраз «Найсвяцейшая Дзева Марыя» ў сярэбранай рызе.

Галерэя

• 
  Галоўны фасад
• 
  Фасад з боку апсіды
• 
  Інтэр'ер
• 
  Інтэр'еры з хорамі
• 
  Алтар
• 
  Плябанія

Літаратура

• Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с. — ISBN 978-985-11-0395-5.

Спасылкі

• На Вікісховішчы ёсць медыяфайлы па тэме Касцёл Святога Лаўрэна (Ушачы)
• Касцёл Святога Лаўрэна (Ушачы) на сайце Radzima.org
• Ушачы — парафія Святога Лаўрэна — catholic.by