Царква ў гонар Адсячэння галавы Іаана Прадцечы (Була)

Царква ў гонар Адсячэння галавы Іаана Прадцечы — праваслаўны храм у в. Була (Івацэвіцкі раён). Размешчана ў баку ад вёскі, у полі. Узор народнага драўлянага дойлідства. Адзначана ў 1871 г.

Праваслаўны храм
Царква ў гонар Адсячэння галавы Іаана Прадцечы
52°51′36″ пн. ш. 25°14′18″ у. д.
Краіна	Беларусь
Вёска	Була
Канфесія	Беларуская праваслаўная царква
Епархія	Пінская і Лунінецкая епархія
Архітэктурны стыль	беларускае народнае дойлідства
Дата пабудовы	1849 год
Статус	Гісторыка-культурная каштоўнасць Беларусі, шыфр 113Г000290

Архітэктура

Царква вырашана прамавугольным у плане працяглым зрубам, накрытым двухсхільным дахам, пераходзячым над трохграннай апсідай у вальмавы. З боку франтальнага фасада ў дах урэзана чатырохгранная шатровая званіца з макаўкай, над апсідай узведзены цыбулепадобны купалок на васьмігранным барабане. Арачны ўваходны праём аформлены чатырохслуповым ганкам пад двухсхільным пакрыццём; над ім у цэнтры трапецападобнага фігурнага зашытага шчыта круглая люкарна. Гарызантальна ашаляваныя фасады апяразаны разным падзорам, рытмічна расчлянёны арачнымі аконнымі праёмамі ў простых дашчаных ліштвах і брусамі-сцяжкамі ў прасценках.

Інтэр’ер

У інтэр’еры мастацкую каштоўнасць уяўляе алтарны абраз-фератрон «Маці Божая з дзіцем» і «Апостал Фама» (мяжа XVIII—XIX стст., палатно на дошцы, драўляная шата), абраз «Укрыжаванне з прадстаячымі» (мяжа XVIII—XIX стст., палатно, алей).

Літаратура

• Праваслаўныя храмы Беларусі / А. М. Кулагін, З. Э. Герасімовіч, У. П. Свентахоўскі. — Мн., БелЭн, 2007.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх
• Царква ў гонар Адсячэння галавы Іаана Прадцечы (Була) на сайце Radzima.org
• Царква ў гонар Адсячэння галавы Іаана Прадцечы (Була) на сайце Глобус Беларусі (руск.)
• Царква ў гонар Адсячэння галавы Іаана Прадцечы (Була) на сайце «Архіварта»