Сяргей Мікітавіч Мурзо

Сяргей Мікітавіч Мурзо
Сяргей Мікітавіч Мурзо
Асабістыя звесткі
Дата нараджэння	1912
Месца нараджэння	Масква, Маскоўская губерня, Расійская імперыя;
Дата смерці	29 кастрычніка 1937
Месца смерці	НКУС Менска[d], Менск, БССР, СССР;
Альма-матар	Беларускі дзяржаўны вышэйшы педагагічны інстытут (1934);
Месца працы	Віцебскі станкабудаўнічы завод імя Камінтэрна;
Прафесійная дзейнасць
Род дзейнасці	паэт
Мова твораў	беларуская
Грамадская дзейнасць
Член у	Беларуская асацыяцыя пралетарскіх пісьменнікаў (1932);

Сяргей Мікітавіч Мурзо (1912, Масква — 29 кастрычніка 1937, Менск, НКУС) — беларускі паэт, настаўнік.

Біяграфія

Паходзіў з сям’і рабочага. Да 1930 года працаваў токарам на Віцебскім станкабудаўнічым заводзе «Камінтэрн». У 1934 годзе скончыў Беларускі дзяржаўны вышэйшы педагагічны інстытут. Працаваў настаўнікам сярэдняй школы ў Краснаполлі Магілёўскай вобласці.

Друкаваўся з 1929 года. У пачатку 1930-х гадоў быў членам Віцебскай асацыяцыі пралетарскіх пісьменнікаў. Належаў да так званых «паэтаў-ударнікаў», асноўнай тэмай якіх было ўслаўленне працы рабочага. Імкнуўся ўнесці лірычнае светаўспрыняцце ў вершы з «машыннай» тэматыкай.

3 лістапада 1936 года арыштаваны НКУС БССР у Менску або пасля арышту дастаўлены ў Менск. 28 кастрычніка 1937 года прыгавораны пазасудовым органам (спецтройкай НКУС БССР) як «член антысавецкай тэрарыстычнай шпіёнска-дыверсійнай арганізацыі» да вышэйшай меры пакарання. Расстраляны 29 кастрычніка 1937 года.

Рэабілітаваны 10 лістапада 1956 года ваеннай калегіяй Вярхоўнага суда СССР. Асабовая справа Мурзо № 3929 захоўваецца ў архіве УКДБ Магілёўскай вобласці.

Літаратура

Мурзо Сяргей // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1992—1995. — Т. 4. — С. 343.
Энцыклапедыя літаратуры і мастацтва Беларусі: У 5-і т. / Рэдкал.: І. П. Шамякін (гал. рэд.) і інш.. — Мн.: БелСЭ, 1986. — Т. 3. Карчма — Найгрыш. — С. 706. — 751 с. — 10 000 экз.
МУРЗО Сяргей Мікітавіч // Маракоў Л. Ахвяры і карнікі. — Мн.: Зміцер Колас, 2007. — ISBN 978-985-6783-38-6. Архівавана з першакрыніцы 3 кастрычніка 2022.