Чужаніца

«Чужані́ца» — дэбютны студыйны альбом беларускага рок-гурта «ULIS», які быў запісаны ў 1989 годзе.

Чужаніца
музычны альбом ULIS
Дата выпуску	1989
Жанр	рок-музыка
Працягласць	50 хв.

Гісторыя стварэння

Запісаны ў верасні 1989 года ў прыватнай студыі гукарэжысёра Рышарда Шміта ў горадзе Ольштын. Пазнаёміў «улісаўцаў» са знакамітым у будучыні польскім гукарэжысёрам, які дагэтуль займаўся толькі сімфанічнай музыкай, Яраслаў Гайда. У фінансавым плане запіс забяспечыў перакладчык Ян Максімюк, які сабраў большую частку грошаў, патрэбных для запісу. На запіс было ўсяго тры дні, музыканты гурта прыехалі ў Польшчу і зрабілі запіс 11 песень. У 1991 годзе фірма «Мелодия» выдала альбом на вінілавай кружэлцы масавым накладам. Вокладку ў стыле мінімалізм аформіў мастак Міхал Анемпадыстаў. На гэтае выданне па розных тэхічных прычынах не трапілі 3 песні, якія з’явіліся толькі на CD-перавыданні лэйблам «БМАgroup» у 2004 годзе. Таксама альбом быў перавыдадзены на аудыёкасеце фірмай «Ковчег» у 1996 годзе.

Спіс трэкаў

№	Назва	Аўтар	Працягласць
1.	«Цягнік на Нясьвіж»	Сяргей Краўчанка, Фелікс Аксёнцаў	4:18
2.	«Краіна ў кратах»	Сяргей Краўчанка, Кірыл Шэвандо, Фелікс Аксёнцаў	4:02
3.	«Пляц Францыска»	Сяргей Краўчанка, Фелікс Аксёнцаў	4:58
4.	«Гэстапа»	Слава Корань, Фелікс Аксёнцаў	4:01
5.	«Іржавыя дні»	Слава Корань, Фелікс Аксёнцаў	5:15
6.	«Акторка»	Слава Корань, Фелікс Аксёнцаў	4:51
7.	«Чужаніца»	Слава Корань, Фелікс Аксёнцаў	3:02
8.	«Калі імпэрыя зьнікне»	Сяргей Краўчанка, Фелікс Аксёнцаў	5:58
9.	«Пакуль спяваю»	Слава Корань, Фелікс Аксёнцаў	4:41
10.	«Канкістадоры»	Слава Корань, Фелікс Аксёнцаў	3:35
11.	«Мы прыйдзем сюды»	Слава Корань, Фелікс Аксёнцаў	5:10
50:20

Крытыка

Адам Глобус у сваіх нататках пра гурт у 1991 годзе назваў «Чужаніцу» наогул першым беларускім альбомам, праз які была пяройдзеная мяжа, што падзяляла зборкі песень і ўласна альбомы: «„Чужаніца“ для многіх застаецца лепшым рок-творам: як першае каханне, як першае слова, што скажа тваё дзіця». Аднак знакавасць «Чужаніцы» дайшла да масаў не адразу. На пачатку было прызнанне за мяжой — у Польшчы, Эстоніі, Германіі. «Навошта нам садраныя „U2“, калі лепей паслухаць арыгінал», — пісаў магілёўскі часопіс «Окарак». «Іх рок сапраўды нічога не варты для вушэй, якія не чуюць гармоніі», — адказвала на гэта нямецкая прэса. Арцемій Троіцкі назваў «Уліс» у адным з інтэрв’ю таго часу адным з найлепшых гуртоў СССР. Паводле меркавання музычнага сеткавага рэсурсу «Тузін Гітоў», якое выказана ў матэрыяле пра «Залю славы» беларускага року, «Чужаніца» — сапраўдны тэстамент, яшчэ належным чынам неацэнены і непрачытаны.

Удзельнікі запісу

• Слава Корань — электрагітара, акустычная гітара
• Сяргей Краўчанка — бас, акустычная гітара
• Андрэй Патрэй — спеў
• Валеры Цыніцкі — перкусія
• Кірыла Шэвандо — бубны

Спасылкі

• «Ulis» — Чужаніца (1989) на YouTube