Брэсцкі дзяржаўны музычны каледж імя Рыгора Шырмы

Брэсцкі дзяржаўны музычны каледж імя Рыгора Шырмы (БДМК) — дзяржаўная сярэдняя спецыяльная навучальная ўстанова ў г. Брэсце. Размешчаны па вул. Гогаля, 7.

Брэсцкі дзяржаўны музычны каледж імя Рыгора Шырмы
Заснаваны	снежань 1939
Дырэктар	Рамуальд Адольфавіч Жабінскі
Тып	сярэдняя спецыяльная НУ
Адрас	Брэст, вул. Гогаля, 7
Сайт	mus.by

Гісторыя

Рашэнне пра адкрыццё ў Брэсце музычнага вучылішча было прынята ў снежні 1939 года. Гэта была першая музычная сярэдняя навучальная ўстанова ў Заходняй Беларусі.

Сярод тых, хто спрычыніўся да заснавання вучылішча былі такія вядомыя музыканты і педагогі, як Шубік І. Я., Дземчанка М. А., Дабратворская Я. М., Арэнская М. І., Мінстэр М. Я., Жукоўская В. Г., Русін М. А., Бубен Т. Г. і іншыя. У гады Другой сусветнай вайны будынак вучылішча быў разбураны, у агні загінулі музычныя інструменты і бібліятэка. Пасля вызвалення Брэста ад гітлераўскіх захопнікаў ужо 1 верасня 1944 года аднавіліся заняткі ў вучылішчы. Першы выпуск (усяго 3 чалавекі) адбыўся ў 1948 годзе.

За вялікую працу па падрыхтоўцы музычных кадраў у 1969 годзе калектыў вучылішча быў узнагароджаны Ганаровай Граматай Вярхоўнага Савета БССР. У 1990 годзе ў ім адкрылася аддзяленне народнага харавога спеву.

У лістападзе 1993 года рашэннем Брэсцкага аблвыканкаму вучылішча была пераўтворана ў сярэднюю спецыяльную навучальную ўстанову новага тыпу — музычны каледж, а 12 жніўня 1994 года пастановай Савета Міністраў Рэспублікі Беларусь каледжу было прысвоена імя Рыгора Шырмы.

З 1 верасня 1994 года пры каледжы адкрыта дзіцячая музычная школа прафесійнай арыентацыі.

Спецыяльнасці

У цяперашні час па 6 спецыяльнасцях у каледжы навучаюцца 298 навучэнцаў, калектыў каледжу складаюць 127 выкладчыкаў і канцэртмайстраў, з іх 90 % — выпускнікі вучылішча (каледжа). Навучанне ў каледжы дзённае па спецыяльнасцях: музыказнаўства, дырыжыраванне, інструментальнае выкананне, спевы (акадэмічныя), мастацтва эстрады, акцёрскае мастацтва. У каледжы больш за 10 розных творчых калектываў (аркестраў, хароў, ансамбляў), шэрагу з іх прысвоена высокае званне народны.

Дырэктары

У розныя гады музычнае вучылішча ўзначальвалі: Міхаіл Рыгоравіч Солапаў, Леанід Яфімавіч Школьнікаў, Канстанцін Леанідавіч Манучараў, Аляксандр Аляксандравіч Мартыненка, а з 1988 года — Жанна Савіна. Цяпер дырэктарам Брэсцкага дзяржаўнага музычнага каледжу імя Рыгора Шырмы з'яўляецца Рамуальд Адольфавіч Жабінскі.

Вядомыя выпускнікі

• Клаўдзія Канстанцінаўна Каліна, беларуская пісьменніца
• Якаў Сямёнавіч Малайчук, беларускі харавы дырыжор, краязнаўца

Літаратура

• Беларуская энцыклапедыя: У 18 т. Т. 3: Беларусы — Варанец / Рэдкал.: Г. П. Пашкоў і інш. — Мн. : БелЭн, 1996. — Т. 3. — 511 с. — 10 000 экз. — ISBN 985-11-0035-8. — ISBN 985-11-0068-4 (т. 3).

Спасылкі

• Афіцыйны сайт Архівавана 16 снежня 2019.