Булыжыцы

Булы́жыцы (трансліт.: Bulyžycy, руск.: Булыжицы) — вёска ў Магілёўскім раёне Магілёўскай вобласці. Уваходзіць у склад Княжыцкага сельсавета. Размешчана за 22 км на паўночны захад ад Магілёва і чыгуначнай станцыі Магілёў I. Рэльеф раўнінны. Транспартныя сувязі па мясцовай дарозе праз в. Княжыцы і далей па шашы Магілёў — Мінск.

Вёска Булыжыцы Краіна Беларусь Вобласць Магілёўская Раён Магілёўскі Сельсавет Княжыцкі Каардынаты 53°59′33″ пн. ш. 30°05′32″ у. д. Часавы пояс UTC+3 Тэлефонны код +375 222 Паштовыя індэксы 213125 Аўтамабільны код 6 СААТА 7244820021 Булыжыцы на карце Беларусі ±

Гісторыя

Вядома ў Расійскай імперыі з XVIII ст. У 1777 годзе вёска ў Магілёўскім павеце. У 1785 годзе сяльцо, цэнтр маёнтка ў Магілёўскім павеце, у валоданні Княжыцкага дамініканскага кляштара.

У 1845 годзе ў складзе аднайменнага казённага маёнтка ў Магілёўскім павеце Магілёўскай губерні, дзяржаўная ўласнасць працавала карчма.

У 1908 годзе адкрыта школа, якая размяшчалася ў наёмным памяшканні.

Найноўшы час

На базе дарэвалюцыйнай створана працоўная школа першай ступені, у якой у 1925 годзе было 25 вучняў.

25 сакавіка 1918 года згодна з Трэцяй Устаўной граматай вёска абвяшчалася часткай Беларускай Народнай Рэспублікі. 1 студзеня 1919 года згодна з пастановай I з’езда КП(б) Беларусі ўвайшла ў склад Беларускай ССР, аднак 16 студзеня Масква адабрала яе разам з іншымі этнічна беларускімі тэрыторыямі ў склад РСФСР. У сакавіку 1924 года вёску вярнулі БССР, з 17 ліпеня 1924 года ў Магілёўскім раёне Магілёўскай акругі (да 26 ліпеня 1930), з 20 лютага 1938 года ў Магілёўскай вобласці.

У 1930 годзе арганізаваны калгас «Перамога».

У Вялікую Айчынную вайну з ліпеня 1941 года да 27 чэрвеня 1944 года акупіравана нямецка-фашысцкімі захопнікамі. У 1990 годзе ў складзе калгаса імя М. І. Калініна (цэнтр — в. Бракава). Размяшчаліся вытворчая брыгада, жывёлагадоўчы комплекс, ферма буйной рагатай жывёлы, працавалі клуб, сталовая, бібліятэка, магазін.

У 1998 годзе да вёскі далучана вёска Азараўка.

Планіроўка

Планіровачна складаецца з просталінейнай вуліцы, арыентаванай з паўночнага захаду на паўднёвы ўсход і забудаванай двухбакова, шчыльна традыцыйнымі драўлянымі дамамі сядзібнага тыпу. На ўсходняй ускраіне — гаспадарчы сектар.

Насельніцтва

• XVIII стагоддзе:
  • 1785 — 18 двароў, 112 жыхароў.
• XIX стагоддзе:
  • 1845 — 31 двор, 163 жыхары.
  • 1897 — 39 двароў, 265 жыхароў.
• XX стагоддзе:
  • 1909 — 46 двароў, 306 жыхароў.
  • 1926 — 72 двары, 399 жыхароў.
  • 1990 — 28 гаспадарак, 61 жыхар.
• XXI стагоддзе:
  • 2007 — 65 гаспадарак, 128 жыхароў.

Літаратура

• Булыжыцы // Гарады і вёскі Беларусі: Энцыклапедыя. Т. 6, кн. 2. Магілёўская вобласць / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2009. — 592 с.: іл. — 2 000 экз. — ISBN 978-985-11-0440-2.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх