Касцёл Святой Ганны (Ракаў)

Касцёл Святой Ганны — каталіцкі храм у в. Ракаў (Валожынскі раён). Пабудаваны ў 1830 г. з цэглы на ўсходняй ускраіне вёскі, на каталіцкіх могілках. Помнік эклектычнай архітэктуры з элементамі неаготыкі і класіцызму.

Каталіцкі храм
Касцёл Святой Ганны
53°57′58″ пн. ш. 27°04′10″ у. д.
Краіна	Беларусь
Вёска	Ракаў
Канфесія	Рымска-каталіцкая царква
Архітэктурны стыль	эклектыка з элементамі неаготыкі і класіцызму
Дата пабудовы	1830 год
Медыяфайлы на Вікісховішчы

Архітэктура

Прамавугольнае ў плане збудаванне з паўкруглай апсідай накрытае двухсхільным дахам. Галоўны фасад вылучаны паўцыркульным уваходным парталам, завершаны трохвугольным франтонам з чацверыковай сігнатуркай і вуглавымі пінаклямі; у тымпане — круглая люкарна-«ружа». Карніз расчлянёны стральчатай аркай уваходнага парталу. Сцены аздобленыя гранёнымі пілонамі (вуглавыя завершаныя пінаклямі), расчлянёныя пілястрамі ў прасценках паўцыркульных аконных праёмаў.

Інтэр'ер

У інтэр'еры зала перакрытая плоскай столлю на падугах. У паўкруглую прастору апсіды ўпісаная трапецападобная алтарная частка, за якой знаходзіцца паўкруглая сакрысція. Над уваходам хоры на двух слупах з бакавой вітой лесвіцай. Пад алтаром — крыпта.

Брама-званіца

Касцёл і брама-званіца ў пач. XX

Пры ўваходзе на могілкі па восі капліцы размешчаная брама-званіца — трохпралётная арка з цэнтральным лучковым праездам і дзвюхарачным ярусам-звонам.

Могілкі

На могілках шмат старых шляхецкіх пахаванняў, у тым ліку вядомых асоб:

• Міхаіл Рудольфавіч Грушвіцкі (1828—1904), кампазітар. На магіле ў пачатку XX ст. быў усталяваны помнік — крыж з пясчаніку на мармуровым пастаменце.
• князёўна Крысціна Геранімаўна Друцкая-Любецкая (1900—1920) — дачка князя Гераніма Эдвінавіча Друцкага-Любецкага (1861—1919)

Спасылкі

• На Вікісховішчы ёсць медыяфайлы па тэме Касцёл Святой Ганны (Ракаў)
• Касцёл Святой Ганны (Ракаў) на сайце Radzima.org
• Касцёл Святой Ганны (Ракаў) на сайце Глобус Беларусі (руск.)
• Krystyna Maria Józefa Jadwiga Drucka-Lubecka (Drucka-Lubecka)