ФК Ашмяны-БДУФК

«Ашмяны-БДУФК» — былы беларускі футбольны клуб з горада Ашмяны.

Ашмяны-БДУФК
Расфарміраваны	2021
Горад	Ашмяны, Беларусь
Стадыён	ФАК Умяшчальнасць: 525
Чэмпіянат	Першая ліга
2020	10 месца
Асноўная форма Гасцявая форма

Гісторыя

З 2007 года клуб выступаў у чэмпіянаце Гродзенскай вобласці, дзе займаў месцы ў ніжняй палове табліцы.

У пачатку 2015 года мінскі клуб «Славянін», шукаючы магчымасць пераехаць у іншы горад, здолеў дамовіцца аб пераездзе з кіраўніцтвам Ашмян. У выніку, у Другую лігу замест «Славяніна» была заяўлена каманда «Ашмяны». Каманда была ўкамплектавана пераважна былымі ігракамі «Славяніна», таксама ў яе склад быў запрошаны шэраг мясцовых футбалістаў. Галоўным трэнерам «Ашмян» стаў былы трэнер «Славяніна» Васіль Смірных. У сезоне 2015 «Ашмяны» адразу сталі адным з лідараў сваёй падгрупы А, аднак у выніку занялі трэцяе месца і выйшлі ў фінальны раўнд, дзе не здолелі ўзняцца вышэй за пяты радок.

У пачатку 2016 года, пасля спынення існавання першалігавай «Бярозы-2010» і адмовы «Маладзечна-ДЮСШ-4» ад павышэння «Ашмянам» было прапанавана месца ў Першай лізе, на што каманда адказала згодай. Аднак, замацавацца ў Першай лізе не атрымалася — каманда хутка апынулася ў канцы турнірнай табліцы. Улетку шэраг ігракоў «Ашмян» быў абвінавачаны ў арганізацыі дагаварных матчаў, яны былі выключаны з каманды, склад якой у выніку абнавіўся больш чым напалову. Восенню 2016 года галоўным трэнерам замест Васіля Смірных стаў Антуан Маёраў, але і ён не здолеў выратаваць каманду ад апошняга месца і вылету ў Другую лігу.

Сезон 2017 каманда, якая дапоўніла назву «Ашмяны» да «Ашмяны-БДУФК», пачала ў Другой лізе са штрафам у 5 ачкоў за ўдзел ігракоў у дагаварных матчах у папярэднім сезоне. Пачатак атрымаўся няўдалым — «Ашмяны» саступілі асноўным канкурэнтам і ўскладнілі сабе барацьбу за высокія месцы. Аднак пазней каманда набрала абароты і стала перамагаць у адным матчы за другім, нярэдка з разгромным лікам. У выніку «Ашмяны» неўзабаве апынуліся ў верхняй частцы табліцы і, разграміўшы ў апошнім туры «Любань» з лікам 12:1, занялі трэцяе месца. Пры гэтым нападнік «Ашмян» Дзмітрый Купнеўскі з 31 голам стаў найлепшым бамбардзірам турніру.

У сезоне 2018 «Ашмяны» таксама былі адным з фаварытаў Другой лігі, але даволі хутка адсталі ад «Руха» і «Крумкачоў» і былі вымушаны змагацца за трэцяе месца. Доўгі час паспяхова ўтрымліваючы трэці радок, у канцы сезону ашмянская каманда прапусціла наперад рэчыцкі «Спадарожнік» і фінішавала чацвёртай. У сезоне 2019 «Ашмяны-БДУФК» доўгі час вялі барацьбу за першынство з дзяржынскім «Арсеналам», у выніку каманда стала другой і выйшла ў Першую лігу.

У 2020 годзе, запрасіўшы некалькіх вопытных ігракоў, «Ашмяны-БДУФК» сталі серадняком Першай лігі і ў выніку скончылі сезон на 10-м месцы. Аднак, у пачатку 2021 года стала вядома, што з-за фінансавых цяжкасцей каманда не выступіць у Першай лізе і спыніць існаванне. Новая каманда з Ашмян, складзеная пераважна з мясцовых ігракоў, была заяўлена ў Другую лігу ў сезоне 2021.

Эмблемы

• Гісторыя эмблем «Ашмян»
• 

  да 2018 года

• 

  2019—2020

Папярэднія назвы

• 2007—2013: «Ашмяны»
• 2014: «Факел»
• 2015—2016: «Ашмяны»
• 2016—2020: «Ашмяны-БДУФК»

Статыстыка выступленняў

Чэмпіянат і Кубак Беларусі

Сезон	Ліга	М	Г	В	Н	П	Галы	Ачкі	Кубак	Заўвагі
2007	Чэмпіянат Гродзенскай вобласці (Д4)	11	30	9	4	17	41–66	31
2008	Чэмпіянат Гродзенскай вобласці (Д4)	12	28	8	5	15	37–73	29
2009	Чэмпіянат Гродзенскай вобласці (Д4)	10	20	3	0	17	21–68	9
2010	Чэмпіянат Гродзенскай вобласці (Д4)	10	20	2	5	13	24–58	11
2011	Чэмпіянат Гродзенскай вобласці (Д4)	9	24	8	4	12	56–51	28
2012	Чэмпіянат Гродзенскай вобласці (Д4)	11	22	4	1	17	26–66	13
2013	Чэмпіянат Гродзенскай вобласці (Д4)	14	26	2	4	20	27–97	10
2014	Чэмпіянат Гродзенскай вобласці (Д4)	10	18	1	1	16	17–62	4
2015	Другая — А (Д3)	3	18	9	5	4	38–19	32	1/16 фіналу	Выхад у фінальны этап
	Фінальны этап	5	141	5	4	5	22–20	19		Атрыманне месца ў Першай лізе
2016	Першая (Д2)	14	26	2	2	22	15–64	72	1/32 фіналу	Вылет у Другую лігу
2017	Другая (Д3)	3	26	18	3	5	100–27	523	1/32 фіналу
2018	Другая (Д3)	4	28	18	1	9	82–33	55	1/32 фіналу
2019	Другая (Д3)	2	28	23	2	3	99–24	71	1/16 фіналу	Выхад у Першую лігу
2020	Першая (Д2)	10	26	6	8	12	35–43	26	1/16 фіналу	Спыненне існавання

• ¹ Улічваючы 6 гульняў, перанесеных з 1-га раўнда. Паказчыкі ўласна ў фінальным этапе: 8 матчаў, 3—2—3, розніца мячоў 13—15.
• ² Вынік матча «Ашмяны» — «Прамень» (3:3) быў ануляваны, прысуджаны лік 0:0 без дадання ачкоў абодвум камандам.
• ³ З каманды знята 5 ачкоў за ўдзел ігракоў клуба ў дагаварных матчах у сезоне 2016.

Галоўныя трэнеры

• Васіль Смірных (2015 — верасень 2016)
• Антуан Маёраў (верасень 2016 — снежань 2020)

Спасылкі

• Профіль на сайце teams.by (руск.)