Айлантавы шаўкапрад

Айлантавы шаўкапрад (Samia cynthia) — від паўлінавочак з падсямейства Arsenurinae. Вусені выкарыстоўваюцца чалавекам для атрымання шоўку, але не з’яўляюцца прыручаным відам, як тутавы шаўкапрад (Bombyx mori).

Айлантавы шаўкапрад
Навуковая класіфікацыя
прамежныя рангі Дамен:  Эўкарыёты Царства:  Жывёлы Падцарства:  Эўметазоі Без рангу:  Двухбакова-сіметрычныя Без рангу:  Першаснаротыя Без рангу:  Ecdysozoa Без рангу:  Panarthropoda Тып:  Членістаногія Падтып:  Трахейнадыхальныя Надклас:  Шасціногія Клас:  Насякомыя Падклас:  Крылатыя насякомыя Інфраклас:  Навакрылыя насякомыя Надатрад:  Насякомыя з поўным метамарфозам Атрад:  Матылі Падатрад:  Glossata Інфраатрад:  Heteroneura Надсямейства:  Bombycoidea Серыя:  Saturniiformes Сямейства:  Паўлінавочкі Падсямейства:  Saturniinae Род:  Samia Від:  Айлантавы шаўкапрад
Міжнародная навуковая назва
Samia cynthia
Сістэматыка на Віківідах Выявы на Вікісховішчы ITIS   936212 NCBI   7127

Распаўсюджанне

Распаўсюджаны ў Кітаі, Індыі, Малайзіі, Індакітаі, на востраве Ява, Японскіх астравах, на Філіпінскіх астравах і, як інтрадукаваны від, у Еўропе.

У Еўропу быў першапачаткова завезены для вытворчасці шоўку, які апынуўся занадта дарагім, але некалькі матылькоў паляцелі з няволі і ўтварылі папуляцыі ў асобных еўрапейскіх гарадах, такіх як Вена, Парыж, Страсбур, дзе дрэвы роду Ailanthus вырошчваліся як дэкаратыўныя расліны.

Апісанне

Размах крылаў ад 90 да 140 мм. Крылы маюць аліўкава-карычневую афарбоўку, са светлымі паўмесяцавымі плямамі ў цэнтры і шырокай чатырохкаляровай паласой (чорнай, белай, ружовай і ружавата-белай). Верхні бок брушка жаўтлява-шэры.

Развіццё

Самка адкладае яйцы купкамі (па 10-20 штук) на лісце кармавых раслін. Інкубацыя доўжыцца 7-10 дзён. Вусені ў пачатковай стадыі жывуць зграйкамі, маюць жоўты колер. Вусень даўжынёй 7-8 см. Затым вусені становяцца адзіночкамі і набываюць зялёны колер. Перад акукленнем пляце шэра-залацісты кокан, які пры размотванні дае 600 м ніткі, прыдатнай для вырабу тканіны. Зімуе кукалка.

Экалогія

Кармавыя расліны вусеняў: Ailanthus (часцей Ailanthus glandulosa і Ailanthus altissima), бузіна (Sambucus), Арэх (Juglans), сліва (Prunus), біручына (Ligustrum), фарзіцыя (Forsythia), клешчавіна (Ricinus), Laburnum, рабіна (Sorbus), бэз (Syringa), магнолія (Magnolia) і лаўр (Laurus).

Значэнне ў жыцці чалавека

Матылёк разводзіцца ў паўпрыручаным стане ў Паўднёва-Усходняй Азіі для атрымання шоўку, аднак шырокага прамысловага значэння не мае. Спроба яго гадоўлі ў Еўропе ў XIX стагоддзі не ўвянчалася поспехам.

• 
  Самка
• 
  Вусень

Спасылкі

• Butterflies and Moths of North America Ailanthus silkmoth Samia cynthia (Drury, 1773)
• Giant Moths (Saturniidae) of Prince Edward Island, Canada: Samia Cynthia (Drury 1773)