Іван Трафімавіч Цітоў

Іван Трафімавіч Ціто́ў (4 сакавіка 1875 — 27 лістапада 1949) — вучоны ў галіне паталагічнай анатоміі, доктар медыцынскіх навук (1934), прафесар (1927), Заслужаны дзеяч навукі БССР (1939).

Іван Трафімавіч Цітоў
Дата нараджэння	4 сакавіка 1875(1875-03-04)
Месца нараджэння	Радамышль, Радамысльскі павет[d], Кіеўская губерня, Расійская імперыя
Дата смерці	27 снежня 1949(1949-12-27) (74 гады)
Месца смерці	Мінск, БССР, СССР
Месца пахавання	Вайсковыя могілкі
Грамадзянства	СССР  Расійская імперыя
Род дзейнасці	навуковец
Навуковая сфера	паталагічная анатомія
Месца працы	Кіеўскі нацыянальны ўніверсітэт імя Тараса Шаўчэнкі БДУ БДМУ Віцебскі дзяржаўны медыцынскі ўніверсітэт Інстытут фізіялогіі НАНБ
Навуковая ступень	доктар медыцынскіх навук (1934)
Навуковае званне	прафесар (1927) акадэмік Акадэміі навук Беларускай ССР (1940)
Альма-матар	Кіеўскі нацыянальны ўніверсітэт імя Тараса Шаўчэнкі
Вядомыя вучні	Васіль Фёдаравіч Чарвакоў
Узнагароды

Біяграфія

Нарадзіўся ў горадзе Радамышль Кіеўскай губерні (сучасны адміністрацыйны цэнтр Радамышльскага раёна Жытомірскай вобласці Украіны). У 1893 скончыў Кіева-Пячорскую гімназію, у 1898 годзе — медыцынскі факультэт Кіеўскага ўніверсітэта і працаваў у ім асістэнтам кафедры паталагічнай анатоміі ў 1898—1900 гг. У 1900—1905 гг. на ваеннай службе — урач у Бесарабскім пяхотным палку. У 1905—1913 гг. працаваў празектарам у Кіева-Пакроўскай бальніцы і адначасова асістэнтам кафедры паталагічнай анатоміі ў Кіеўскім універсітэце. У 1913—1923 гг. на пасадах празектара, прыват-дацэнта кафедры паталагічнай анатоміі і адначасова прафесар у Кіеўскім жаночым медыцынскім інстытуце. У 1923—1930 гг. І. Т. Цітоў у Беларускім дзяржаўным універсітэце — загадчык аб’яднанай кафедрай паталагічнай анатоміі і паталагічнай фізіялогіі медыцынскага факультэта і адначасова ў 1924—1928 гг. загадчык кафедрай судовай медыцыны. У 1930—1941 гг. на пасадзе загадчыка кафедрай паталагічнай анатоміі Мінскага медыцынскага інстытута і адначасова ў 1936—1938 гг. заснавальнік і загадчык кафедры паталагічнай анатоміі Віцебскага медыцынскага інстытута. У 1940 годзе абраны акадэмікам Акадэміі навук Беларускай ССР. У час Вялікай Айчыннай вайны жыў у Беластоку і Нова-Вілейцы, займаўся прыватнай практыкай і лячэннем ваеннапалонных. У 1944—1949 гг. працаваў на пасадзе загадчыка кафедрай у Мінскім медыцынскім інстытуце і адначасова ў 1946—1949 гг. загадчыкам аддзела паталогіі у Інстытуце тэарэтычнай і клінічнай медыцыны Акадэміі навук БССР.

Памёр І. Т. Цітоў 27 лістапада 1949 г. у Мінску. Пахаваны на Вайсковых могілках.

Навуковая дзейнасць і грамадская дзейнасць

І. Т. Цітову належаць працы па паталагічнай анатоміі чумы, склеромы, раку, эндэмічнага валляка, хвароб сардэчна-сасудзістай і дыхальнай сістэм, па высвятленні ролі гельмінтаў у паталогіі чалавека.

Аўтар больш за 50 навуковых прац. Сярод апублікаванага:

• Руководство для практических занятий по патологической гистологии — Мн., 1924.;
• Асновы паталагічнай анатоміі (ч. I: «Агульная паталагічная анатомія», 1935, ч. II: «Спецыяльная паталагічная анатомія», 1937).

Кіраваў выкананнем 7 дысертацый. Займаў пасаду старшыні Беларускага таварыства ўрачоў, быў членам Вучонага медыцынскага савета Наркамата аховы здароўя БССР.

Літаратура

• Цітоў Іван Трафімавіч // Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — 512 с. — 10 000 экз. — ISBN 985-11-0035-8. — ISBN 985-11-0279-2 (т. 17). — С. 120.

Спасылкі

• Титов Иван Трофимович (20.02(04.03).1875-27.11.1949) Архівавана 23 ліпеня 2019. (руск.) // Сайт Беларускага дзяржаўнага медыцынскага ўніверсітэта
• Іван Трафімавіч Цітоў у базе даных «История белорусской науки в лицах» Цэнтральнай навуковай бібліятэкі імя Якуба Коласа НАН Беларусі (руск.)
• Падручнік І. Т. Цітова «Асновы паталагічнай анатоміі» // Рэспубліканская навуковая медыцынская бібліятэка