Святаслаў Усеваладавіч

Святаслаў Усевалдавіч (у хрышчэнні Міхаіл; пасля 1116 — 27 ліпеня 1194) — князь тураўскі, вялікі князь кіеўскі.

Сын вялікага князя Усевалада Ольгавіча. У 1140 пасланы бацькам княжыць у Ноўгарад, аднак там яго не прынялі. Каля 1142 бацька пасадзіў яго ў Тураве, але хутка туды з Пераяслава пераведзены Вячаслаў Уладзіміравіч, а Святаслаў Усевалдавіч атрымаў Уладзімір-Валынскі. У 1146 па загадзе вялікага князя Ізяслава Мсціславіча Святаслаў Усевалдавіч разам з Расціславам Мсціславічам выгнаў Вячаслава Уладзіміравіча з Турава. Пасля смерці Ізяслава Мсціславіча (1154) Святаслаў Усевалдавіч пільнаваў Кіеў, пакуль туды не прыйшоў княжыць Расціслаў Мсціславіч; за гэту паслугу атрымаў ад яго Тураў і Пінск, аднак праз год іх страціў. У 1162 удзельнічаў разам з іншымі князямі ў паходзе на Слуцк супраць Уладзіміра Мсціславіча. У 1164 захапіў Чарнігаўскае княства, а свайго сына Алега паслаў у Гомель. У 1176—94 вялікі князь кіеўскі. У 1180 з наўгародскім войскам удзельнічаў у вялікім кааліцыйным паходзе на Друцк, спаліў там астрог. 3 1143 жанаты з дачкой полацкага князя Васількі Святаславіча Марыяй.

Літаратура

• Пазднякоў В. Святаслаў Усевалдавіч // БЭ ў 18 т. Т. 14. Мн., 2002.