Ілья Аляксандравіч Гітгарц

Ілья́ Алякса́ндравіч Гі́тгарц (18 (30) сакавіка 1893, Адэса — 3 лютага 1966, Мінск) — беларускі дырыжор і педагог. Заслужаны дзеяч мастацтваў Беларусі (1955).

Ілья Аляксандравіч Гітгарц
Дата нараджэння	30 сакавіка 1893(1893-03-30)
Месца нараджэння	Адэса, Адэскі павет, Херсонская губерня, Расійская імперыя
Дата смерці	3 лютага 1966(1966-02-03) (72 гады)
Месца смерці	Мінск, БССР, СССР
Альма-матар	Санкт-Пецярбургская дзяржаўная кансерваторыя імя М. А. Рымскага-Корсакава
Месца працы	Беларуская дзяржаўная акадэмія музыкі
Музычная дзейнасць
Прафесіі	дырыжор

Біяграфія

Скончыў Петраградскую кансерваторыю па класе скрыпкі С. П. Каргуева (1916) і кампазіцыі М. А. Сакалова (1918).

Дэбютаваў у Палтаўскім оперным тэатры (1919). Быў дырыжорам оперы Народнага дома ў Петраградзе і загадчыкам музычнай часткай Другога Беларускага тэатра ў Віцебску (1922—1930). Быў адным з арганізатараў і дырыжораў Беларускай студыі оперы і балета.

У 1947—1951 гадах — дырыжор Беларускага тэатра оперы і балета (Мінск), дзе ажыццявіў пастаноўку оперы «Кастусь Каліноўскі» Лукаса (1947), балета «Князь-возера» Залатарова (1948) і іншых твораў. Працаваў у оперных тэатрах Куйбышава, Ташкента, Бішкека, Пермі, быў галоўным дырыжорам Іванаўскай філармоніі. У 1937—1939 гадах — дырыжор Музычнага тэатра імя У. І. Неміровіча-Данчанкі (Масква).

З 1947 года выкладаў у Беларускай кансерваторыі (з 1949 года — дацэнт).

Творчасць

Дырыжорскія інтэрпрэтацыі Гітгарца выяўлялі ўласцівыя яму непасрэднасць адчування музыкі, імправізацыйны пачатак у выказванні, асаблівую ўвагу да меладычнага боку твора.

Аўтар музыкі да драматычных пастановак тэатра імя Я. Коласа «Каля тэрасы» М. Грамыкі (1927), «Калі спяваюць пеўні» Ю. Юр’іна (1928), «Качагары» І. Гурскага (1931).

Пастаноўкі

• «Кармэн» Ж. Бізэ (1933)
• «Яўген Анегін» П. Чайкоўскага (1933, 1948)
• «Пікавая дама» П. Чайкоўскага (1931)
• «Чаравічкі» П. Чайкоўскага (1949)
• «Дуброўскі» Э. Напраўніка (1948)
• «Тоска» Дж. Пучыні (1950)
• «Князь-возера» В. Залатарова (1949)
• «Кастусь Каліноўскі» Д. Лукаса (1947)
• «Князь Ігар» А. Барадзіна (1934)
• «Салавей» М. Крошнера (1950)

Літаратура

• Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — 576 с. — 10 000 экз. — ISBN 985-11-0035-8. — ISBN 985-11-0090-0 (т. 5).
• Гітгарц Ілья Аляксандравіч // Тэатральная Беларусь: энцыклапедыя : у 2 т. / рэдкал.: Г. П. Пашкоў [і інш.]. — Мн.: Беларуская Энцыклапедыя, 2002. — Т. 1. — 565 с. — 4 000 экз. — ISBN 985-11-0255-5.
• Энцыклапедыя літаратуры і мастацтва Беларусі: У 5-і т. / Рэдкал.: І. П. Шамякін (гал. рэд.) і інш.. — Мн.: БелСЭ, 1985. — Т. 2. Габой — Карціна. — С. 93. — 702 с. — 9 500 экз.