Смаленскі партызанскі полк

Смаленскі партызанскі полк — партызанскі полк, створаны ў ліпені 1942 года на базе групы партызан, вылучаных з партызанскага злучэння «Баці» і арганізатарскай групы І. Ф. Садчыкава. Дзейнічаў на акупіраванай тэрыторыі Смаленскай (Касплянскі і Дзямідаўскі раёны), Віцебскай (Сенненскі, Чашніцкі, Талачынскі і Ушацкі раёны) і Вілейскай (Куранецкі раён) абласцей, на тэрыторыі Беларусі дзейнічаў з сакавіка 1943. 3 ліпеня 1944 полк (942 партызаны, 4 батальёны, 14 атрадаў) злучыўся з Чырвонай Арміяй.

Смаленскі партызанскі полк
Гады існавання	1942—1944
Краіна	РСФСР Беларуская ССР
Падпарадкаванне	Беларускі штаб партызанскага руху
Тып	партызаны
Функцыя	барацьба з нямецкімі акупацыйнымі ўладамі
Колькасць	942 партызаны (3 ліпеня 1944)
Дыслакацыя	Смаленская вобласць Віцебская вобласць Вілейская вобласць
Войны	Вялікая Айчынная вайна
Удзел у	Вялікая Айчынная вайна
Камандзіры
Вядомыя камандзіры	І. Ф. Садчыкаў

Склад

• 4 батальёны;
• 1-ы атрад;
• 2-і атрад;
• 3-і атрад;
• 4-ы атрад;
• 5-ы атрад;
• 6-ы атрад;
• 7-ы атрад імя Салаўёва;
• 8-ы атрад імя Самойленкі;
• 9-ы атрад;
• 10-ы атрад;
• 11-ы атрад;
• 12-ы атрад;
• 13-ы атрад;
• 14-ы атрад.

Камандаванне

Камандзір

• І. Ф. Садчыкаў.

Камісар

• А. Ф. Юр’еў.

Начальнікі штаба

• Г. П. Дамарацкі;
• П. Г. Міняеў.

Гісторыя

Партызаны праводзілі дыверсіі на чыгунках Смаленск — Орша, Віцебск — Смаленск, Віцебск — Орша, Лепель — Орша, Полацк — Маладзечна. Разбілі гарнізоны ў вёсках Латыгаль (красавік 1943), Гарывец (жнівень 1943) Сенненскага, Чарэя (кастрычнік 1943) Чашніцкага раёнаў, разам з іншымі брыгадамі авалодалі горадам Чашнікі, удзельнічалі ў Лепельскай аперацыі. У красавіку — маі 1944 года ўдзельнічалі ў баях супраць карнай экспедыцыі на тэрыторыі Полацка-Лепельскай партызанскай зоны на рубяжы вёсак Заскаркі, Касарэва, Белы Двор, Кунцэвічы, утрымлівалі абарону ў раёне азёр Канашы — Усомля, вёсак Труды — Хоццевічы Ветрынскага раёна. У маі прарвалі нямецкую абарону на рубяжы вёсак Матырына — Новае Сяло — Паперына, разбілі нямецкія гарнізоны ў вёсках Новае Сяло і Паперына Ушацкага раёна. У ноч на 26 чэрвеня 1944 года на чыгунцы Полацк — Маладзечна ў раёне станцый Будслаў — Крывічы падарвалі і папсавалі больш за 1 тысячу рэек. Перад наступленнем Чырвонай Арміі кантралявалі дарогі Куранец — Нарач, Вілейка — Нарач, перакрылі шлях праціўніку, які адступіў да возера Нарач. У ліпені 1944 разграмілі нямецкі абоз, на рэках Нарач і Вілія аднавілі пераправы для савецкіх войск.

Памяць

Полк увекавечаны ў мемарыяльным комплексе «Прарыў» у ліку 16 партызанскіх брыгад.

Гл. таксама

• Латыгальскі бой
• Чашніцкія баі
• Полацка-Лепельская бітва

Літаратура

• Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — 680 с. — 20 000 экз. — ISBN 5-85700-012-2.