Цодзік Львовіч Даўгапольскі
Цодзік Львовіч Даўгапольскі (11 жніўня 1879—16 ліпеня 1959) — яўрэйскі пісьменнік.
Цодзік Львовіч Даўгапольскі | |
---|---|
ідыш: צדוק דאלגאפאלסקי | |
Асабістыя звесткі | |
Псеўданімы | Ц. Городокер[1] |
Дата нараджэння | 11 жніўня 1879[2] |
Месца нараджэння | |
Дата смерці | 16 ліпеня 1959[2] (79 гадоў) |
Месца смерці | |
Грамадзянства | Расійская імперыя, СССР |
Прафесійная дзейнасць | |
Род дзейнасці | пісьменнік |
Гады творчасці | 1914—1959 |
Жанр | паэзія, проза |
Мова твораў | беларуская, ідыш, руская |
Грамадская дзейнасць | |
Партыя | |
Творы ў Вікікрыніцах |
Біяграфія правіць
Прадзед пісьменніка валодаў кавалкам зямлі ў Даўгаполлі.
Ц. Даўгапольскі нарадзіўся ў горадзе Гарадок Віцебскай губерні ў сям’і меламеда Лейбы. Маці служыла ў магазіне. У сям’і было 7 дзяцей. З імі жылі пляменніца і старая баба. Хатка стаяла на Паметнай вуліцы ля шашы.
З трынаццаці год працаваў на шчаціннай фабрыцы ў Невелі. Вельмі цяжкімі былі ўмовы побыту рабочых. Захварэў на вострае малакроўе, вярнуўся дамоў. У 1909 годзе ў Вялікіх Луках экстэрнам здаў экзамен на званне хатняга настаўніка, працаваў у вёсцы Захар’іна Магілёўскай губерні. У 1912 годзе вярнуўся ў Гарадок і на працягу шасці гадоў узначальваў яўрэйскае вучылішча. Быў актыўным членам Бунда. Пасля Кастрычніцкай рэвалюцыі працаваў інструктарам Наркама адукацыі, дырэктарам дзіцячага дома ў Віцебску, пазней — у газетах і часопісах. З 1925 г. у газеце «Акцябэр» (Менск). З 1933 г. працаваў у Дзяржвыдзе БССР. У 1938 годзе рэпрэсаваны. Арыштаваны 27 красавіка ў Мінску па адрасе: вул. Камсамольская, д. 1/13, кв. 2. Асуджаны пазасудовым органам НКВД 27 верасня як «былы член Бунда» і за «антысавецкую агітацыю» да 8 гадоў лагераў і 5 гадоў пазбаўлення правоў. Адбываў пакаранне ў Казахстане і быў вызвалены ў 1943 годзе. Вязняў выпусцілі, калі да лагера набліжаліся нямецка-фашысцкія войскі. Пісьменнік дайшоў пехатой у савецкі тыл, выпадкова сустрэў сям’ю сястры Зіны, а потым сям’ю дачкі. Быў настаўнікам на Урале. Пасля вайны высланы з Ленінграда, жыў у Віцебску. Цяжка захварэўшы, вясной 1959 пераехаў да дачкі ў Ленінград, дзе і памёр.
Рэабілітаваны пракуратурай Мінскай вобласці 5 жніўня 1993.
Жонка і два сыны забіты ў гета.
Творчасць правіць
Дэбютаваў допісам у нелегальным бундаўскім выданні ў 1898 годзе. У 1914 годзе выдаў п’есы «Карціны з мястэчка» (Вільня). Пісаў на ідышы, беларускай і рускай мовах. Аўтар раманаў, аповесцей, нарысаў, фельетонаў і п’ес. Друкаваўся ў «Штэрне». Творы выдаваліся ў Вільні, Менску, Маскве, Харкаве. У 1931 годзе выйшаў зборнік вершаў «З пяром у руцэ». Сярод апублікаванага:
- раманы «Каля адчыненай брамы» (1928, беларускі пераклад 1931), «Шоўк» (1934), «На савецкай зямлі» (1931);
- аповесць «Агітпоезд» (1933, беларускі пераклад 1935);
- п’есы «Бітва машын» (1930), «Да апошняга» (1931), «Калгасны сургуч» (1933);
- кніга кніга «Адваротны бок новага быту» (1928);
- Зборнікі прозы «Навыварат» (1928), «На савецкай зямлі» (1931), «Навелы» (1936);
- Dem Zeydns Kloles. Дэм зэйднс клолэс. Дедушкины проклятия. Одноактная детская комедия (на идише). Рис. Элиэзера Лисицкого. (Передняя и задняя обложки, 2 ил.). — Москва, издание Центрального еврейского комиссариата, 1919. 30 с. с ил.[3]
і інш.
Аўтар успамінаў. Аўтабіяграфічны раман, падрыхтаваны да друку, загінуў у час вайны.
Браў удзел у падрыхтоўцы кнігі «Ніколі не забудзем» з успамінамі беларускіх дзяцей.
Раман «Шоўк» прысвечаны будаўніцтву магілёўскай шоўкавай фабрыкі. Творы ўключаліся ў вучэбныя праграмы яўрэйскіх школ у Беларусі. На беларускую мову іх перакладалі Б. Клімчук, І. Плаўнік, С. Плаўнік (Бядуля).
Зноскі
- ↑ Шульман А. Еврейский Городок // Библиотека журнала «МИШПОХА» (руск.)
- ↑ а б в г National Library of Israel Names and Subjects Authority File Праверана 20 жніўня 2023.
- ↑ RARUS’S GALLERY (руск.)
Літаратура правіць
- Кудраўцаў І. Ф. Даўгапольскі Цодзік Львовіч // Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).
- Багдановіч І. Э. Даўгапольскі Цодзік // Беларускія пісьменнікі : біябібліяграфічны слоўнік : у 6 т. / рэдкал.: І. Э. Багдановіч [і інш.]. — Мінск : БелЭн імя П. Броўкі, 1993. — Т. 2 : Верабей-Іваноў. — С. 332—333.
- Іофе, Э. Р. Малюнкі з яўрэйскага мястэчка // Літаратура і мастацтва. — 2019. — 20 верас. — С. 11.