Андрэй Рыгоравіч Капуцкі

Андрэй Рыгоравіч Капуцкі
Андрэй Рыгоравіч Капуцкі
Род дзейнасці	грамадскі дзеяч, палітык, празаік, паэт, журналіст
Дата нараджэння	2 мая 1897
Месца нараджэння	Маладзечна, Маладзечанскі павет, Віленскае ваяводства, Польская Рэспубліка;
Дата смерці	17 мая 1934 (37 гадоў)
Месца смерці	НКУС Менска[d], Менск, БССР, СССР;
Грамадзянства	БССР;
Месца працы	Звязда; Полымя; Інстытут гісторыі партыі пры ЦК КПБ; Цэнтральны камітэт КПБ; Савецкая Беларусь;
Альма-матар	Маладзечанская настаўніцкая семінарыя; Камуністычны ўніверсітэт Беларусі імя У. І. Леніна;
Партыя	Камуністычная партыя Заходняй Беларусі;
Член у	Беларуская рэвалюцыйная арганізацыя;
	Медыяфайлы на Вікісховішчы
	Творы ў Вікікрыніцах

Андрэй Рыгоравіч Капуцкі (псеўданімы: Я. Пралеска; Язэп Пралеска; партыйныя псеўданімы: Лёкса; Хвастоў; 2 мая 1897, Маладзечна — 17 мая 1934, Менск, НКУС) — грамадскі і палітычны дзеяч, празаік, паэт, журналіст.

Біяграфія

Скончыў Маладзечанскую настаўніцкую семінарыю, у 1916 годзе прызваны ў войска. У 1917 годзе жыў у Петраградзе. З 1918 года ў Маладзечне. У перыяд нямецкай і польскай акупацыі займаўся падпольнай дзейнасцю. Адзін з заснавальнікаў і кіраўнікоў Беларускай рэвалюцыйнай арганізацыі (1922), разам з якой у снежні 1923 года ўступіў у КПЗБ. Неаднаразова арыштоўваўся польскімі ўладамі — у 1919—1922, 4.10.1925 (апошні раз прасядзеў у турме без суда 14 месяцаў).

У ліпені 1927 года нелегальна перайшоў польска-савецкую мяжу. Жыў у Менску, працаваў у рэдакцыі газеты «Звязда», часопіса «Полымя рэвалюцыі». У сакавіку 1928 года разам з С. Клінцэвічам па даручэнні ЦК КПЗБ удзельнічаў у забойстве ў Вільні М. Гурына-Маразоўскага.

Зноў вярнуўся ў БССР. У 1931 годзе скончыў Камуністычны ўніверсітэт Беларусі. Працаваў у Гістпарце пры ЦК КП(б)Б, загадчыкам сектара друку ЦК КП(б)Б, в. а. рэдактара газеты «Савецкая Беларусь». Як паэт публікаваўся з 1929 года.

Арыштаваны 29 верасня 1933 года ў Менску па адрасе вул. Рэвалюцыйная, д. 1, кв. 6 па справе «Беларускага нацыянальнага цэнтра». 9 студзеня 1934 года прыгавораны да расстрэлу. Расстраляны 9.1.1934 або 17.5.1934. Рэабілітаваны 16 жніўня 1956 года. Асабовая справа К. № 10182-с захоўваецца ў архіве КДБ Беларусі.

Імем Капуцкага названа вуліца ў Маладзечне.