ФК Спадарожнік Рэчыца
«Спадарожнік» — беларускі футбольны клуб з горада Рэчыца, заснаваны ў 2017 годзе. У 2021 годзе выступаў у Вышэйшай лізе чэмпіянату Беларусі.
| Спадарожнік Рэчыца | |||
|---|---|---|---|
.jpg) | |||
| Заснаваны | 2017 | ||
| Горад | Рэчыца, Беларусь | ||
| Стадыён |
«Цэнтральны» Умяшчальнасць: 3000 |
||
| Дырэктар | Алег Манастырскі | ||
| Чэмпіянат | Вышэйшая ліга | ||
| 2021 | ▼ 16 месца, спыненне існавання | ||
| |||
Гісторыя
правіцьДа 2016 года горад на рэспубліканскай арэне быў прадстаўлены клубам «Рэчыца-2014», які ў 1980—1991 гадах меў назву «Спадарожнік». Па выніках сезона 2015 «Рэчыца-2014» страціла месца ў Першай лізе і спыніла існаванне. У другой палове 2016 года каманда Рэчыцкага раёна (фактычна пераемнік «Рэчыцы-2014») прымала ўдзел у чэмпіянаце Гомельскай вобласці.
2017
правіцьУ красавіку 2017 года ў Рэчыцы была заснаваная новая каманда — «Спадарожнік» — якая заявілася ў Другую лігу чэмпіянату Беларусі[1]. Аснову каманды склалі ігракі гомельскага клуба ДЮСШ-ДБК, які ў 2016 годзе выступаў у Другой лізе, а галоўным трэнерам «Спадарожніка» стаў настаўнік ДЮСШ-ДБК Канстанцін Чахаў. Пачатак сезона для клуба атрымаўся няўдалым, але пазней каманду папоўнілі больш вопытныя ігракі, і вынікі «Спадарожніка» сталі паляпшацца. Сезон 2017 каманда скончыла на 5 месцы ў Другой лізе.
2018
правіцьУ сезоне 2018 «Спадарожнік» з пачатку разглядаўся як адзін з фаварытаў лігі, аднак першую палову чэмпіянату правёў няўпэўнена і значна адстаў ад лідараў. У ліпені замест Канстанціна Чахава новым трэнерам быў прызначаны Вячаслаў Ляўчук. Значна змяніўся склад каманды, яе шарэгі папоўніла шмат ігракоў «Асіповічаў». Добра правёўшы другую палову сезона, «Спадарожнік» заняў выніковае тряцяе месца.
2019
правіцьУ сезоне 2019 «Спадарожнік» павінен быў выступаць у Другой лізе, аднак у сувязі з аб’яднаннем магілёўскага «Дняпра» і мінскага «Промня» з’явілася вакантнае месца ў Першай лізе, якое і заняў рэчыцкі клуб. Добра ўзмацніўшыся для Першай лігі, каманда трапіла ў шэраг фаварытаў, пазней доўгі час знаходзілася ў верхняй палове табліцы і прэтэндавала на высокія месцы, аднак скончыла сезон на шостым месцы.
2020
правіцьУ сезоне 2020 у каманду былі запрошаны ігракі з вопытам гульні ў Вышэйшай лізе. «Спадарожнік» хутка апынуўся ўверсе табліцы, надзейна ўтрымліваў першы радок і за некалькі тураў да фінішу забяспечыў выхад у Вышэйшую лігу.
2021
правіцьУ сезоне 2021, нягледзячы на пэўныя праблемы (прадпрыемства «Рэчыцадрэў», якое раней фінансавала каманду, скараціла падтрымку), «Спадарожнік» заявіўся ў Вышэйшую лігу. Значна змяніўся склад каманды, былі запрошаны маладыя ігракі з іншых клубаў, а таксама шэраг легіянераў. У лютым 2021 года была прынята новая эмблема клуба з выявай герба Рэчыцы з Пагоняй, аднак перад стартам чэмпіянату ў сакавіку герб быў прыбраны з эмблемы[2]. Хатнія матчы ў сувязі з неадпаведнасцю рэчыцкага стадыёна патрабаванням Вышэйшай лігі каманда спачатку праводзіла ў іншых гарадах, звычайна на гомельскім стадыёне СДЮШАР № 8, а матч 9-га тура супраць мазырскай «Славіі» (14 мая) прайшоў у Магілёве.
Каманда з самага пачатку апынулася сярод аўтсайдараў і замацавалася ў зоне вылету. У маі 2021 года Ляўчук быў адхілены ад кіраўніцтва камандай, выканаўцам абавязкаў галоўнага трэнера афіцыйна стаў яго памочнік Юрый Лукашоў, аднак фактычнае кіраўніцтва ажыццяўляў запрошаны ў каманду расійскі трэнер Віктар Кумыкоў, які ўпершыню быў заяўлены на матч 8-га тура супраць брэсцкага «Руха» 8 мая[3]. 4 чэрвеня было афіцыйна абвешчана аб звальненні Ляўчука і прызначэнні Кумыкова галоўным трэнерам[4], аднак амаль адразу Кумыкоў пакінуў клуб, да астатніх матчаў каманду рыхтаваў трэнер дубля Аляксей Краўчанка.
12 чэрвеня «Спадарожнік» упершыню ў сезоне згуляў хатні матч у Рэчыцы, дзе саступіў мінскаму «Дынама» 0:5. У наступным хатнім матчы 28 чэрвеня супраць «Віцебска» рэчыцкі клуб, саступаючы па ходзе сустрэчы 0:3, здолеў забіць чатыры галы і перамагчы 4:3. Гэта перамога стала першай у гісторыі беларускай Вышэйшай лігі перамогай каманды, якая саступала па ходзе сустрэчы тры мячы.
У чэрвені 2021 года з-за фінансавых праблем клуб пачалі пакідаць ігракі, 9 ліпеня стала вядома, што адразу 8 ігракоў атрымалі статус свабоднага агента[5]. 14 ліпеня «Спадарожнік» афіцыйна паведаміў АБФФ аб зняцці з чэмпіянату[6], 28 ліпеня на паседжанні выканкама АБФФ клуб быў выключаны са складу ўдзельнікаў Вышэйшай лігі[7]. Паколькі рэчыцкая каманда правяла 50 % сустрэч, то засталася ў выніковай табліцы, у астатніх матчах ёй былі прысуджаны тэхнічныя паражэнні з лікам 0:3.
Эмблемы
правіць- Гісторыя эмблем «Спадарожніка»
-
У 2017—2018 гадах -
У 2019—2020 гадах -
У пачатку 2021 года -
У 2021 годзе
.gif)
.jpg)
Статыстыка выступленняў
правіцьЧэмпіянат і Кубак Беларусі
правіць| Сезон | Ліга | М | Г | В | Н | П | Галы | Ачкі | Кубак | Заўвагі |
|---|---|---|---|---|---|---|---|---|---|---|
| 2017 | Другая (Д3) | 5 | 26 | 14 | 4 | 8 | 59–24 | 46 | 1/32 фіналу | |
| 2018 | Другая (Д3) | 3 | 28 | 18 | 4 | 6 | 79–21 | 58 | 1/32 фіналу | Атрыманне месца ў Першай лізе |
| 2019 | Першая (Д2) | 6 | 28 | 13 | 6 | 9 | 46–36 | 45 | 1/16 фіналу | |
| 2020 | Першая (Д2) | 1 | 26 | 19 | 4 | 3 | 50–18 | 61 | 1/8 фіналу |  Выхад у Вышэйшую лігу
|
| 2021 | Вышэйшая (Д1) | 16 | 30 | 2 | 1 | 27 | 12–82 | 7 | 1/8 фіналу | Зняцце з турніру, спыненне існавання1 |
- 1 «Спадарожнік» зняўся з чэмпіянату пасля 15 праведзеных матчаў, у застаўшыхся гульнях былі залічаны тэхнічныя паражэнні з лікам 0:3.
Галоўныя трэнеры
правіць- Канстанцін Чахаў (красавік 2017 — ліпень 2018)
- Вячаслаў Ляўчук (ліпень 2018 — чэрвень 2021)[8]
- Віктар Кумыкоў (чэрвень 2021)
- Аляксей Краўчанка (в. а. у чэрвені — ліпені 2021)
Зноскі
- ↑ Речицкий «Спутник» заменит «Монтажник» во второй лиге
- ↑ Футбол. Директор "Спутника": напишите, что это мое решение. БФФ вообще была не в курсе пропажи "Погони" с эмблемы нашего клуба(недаступная спасылка). Архівавана з першакрыніцы 5 чэрвеня 2021. Праверана 5 чэрвеня 2021.
- ↑ Футбол. "Рух" — "Спутник". Левчук отсутствует на тренерском мостике гостей, вместо него — россиянин Кумыков (руск.)(недаступная спасылка). pressball.by (8 мая 2021). Архівавана з першакрыніцы 5 чэрвеня 2021. Праверана 5 чэрвеня 2021.
- ↑ Кумыков официально назначен на пост главного тренера "Спутника" (руск.). Football.by (4 чэрвеня 2021). Праверана 5 чэрвеня 2021.
- ↑ Восемь игроков "Спутника" получили статус свободных агентов (руск.). Football.by (9 ліпеня 2021). Праверана 18 верасня 2021.
- ↑ Футбол. "Спутник" направил БФФ уведомление о снятии с чемпионата Беларуси (руск.)(недаступная спасылка). Прессбол (14 ліпеня 2021). Архівавана з першакрыніцы 18 верасня 2021. Праверана 18 верасня 2021.
- ↑ Футбол. "Спутник" официально исключен из состава участников высшей лиги-2021 (руск.)(недаступная спасылка). Прессбол (28 ліпеня 2021). Архівавана з першакрыніцы 18 верасня 2021. Праверана 18 верасня 2021.
- ↑ З мая 2021 года не выконваў абавязкі, фармальна выканаўцам абавязкаў галоўнага трэнера быў Юрый Лукашоў, аднак фактычна камандай кіраваў Віктар Кумыкоў
Спасылкі
правіць- Профіль на сайце globalsportsarchive.com (англ.)
- Профіль на сайце wildstat.ru (руск.)