Ліга Еўропы УЕФА

Ліга Еўропы УЕФА (англ.: UEFA Europa League) — штогадовы еўрапейскі футбольны кубкавы турнір, які праводзіцца пад эгідай УЕФА; другі па значнасці пасля Лігі чэмпіёнаў. Турнір быў заснаваны ў 1971 годзе, першапачатковая назва — Кубак кірмашоў (англ.: Inter-Cities Fairs Cup), потым — Кубак УЕФА (англ.: UEFA Cup). З сезона 2009/10 кубак змяніў фармат і назву, і стаў звацца Ліга Еўропы.

Фармат турніру (пачынаючы з сезона 2009/10): 4 кваліфікацыйныя раўнды (чацвёрты раўнд кваліфікацыі афіцыйна называецца раўнд плэй-оф), групавы турнір і плэй-оф (пачынаючы з 1/16 фіналу). Усе раўнды кваліфікацыі і плэй-оф (за выключэннем фіналу) складаюцца з двух матчаў. Фінал складаецца з аднаго матча на выбраным загадзя полі. Фармат быў скарэктаваны з сезона 2021/22, калі з’явілася Ліга канферэнцый: была скарочана колькасць раўндаў і ўдзельнікаў у кваліфікацыі; на групавым этапе замест 12 груп засталося 8; замест 1/16 фіналу сталі праводзіць дадатковы раўнд плэй-оф паміж камандамі, якія занялі 2-е месца ў групах Лігі Еўропы і 3-е месца ў групах Лігі чэмпіёнаў (пераможцы груп Лігі Еўропы адразу трапляюць у 1/8 фіналу).

У лізе маюць права ўдзельнічаць уладальнікі кубкаў краін, якія займаюць першыя 17 радкоў табліцы каэфіцыентаў УЕФА; каманды, якія выбываюць з Лігі чэмпіёнаў пачынаючы з другога кваліфікацыйнага раўнда; каманды, якія занялі адпаведныя месцы ў сваіх чэмпіянатах (для першых пяці краін паводле табліцы каэфіцыентаў УЕФА, пачынаюць адразу з групавога раўнда). У залежнасці ад месца іх краіны ў табліцы каэфіцыентаў УЕФА каманды пачынаюць барацьбу з таго ці іншага раўнда кваліфікацыі. Каманды, якія прайшлі кваліфікацыю Лігі Еўропы, выбылі на адпаведным раўндзе Лігі чэмпіёнаў, а таксама якія занялі адпаведныя месцы ў чэмпіянатах першых пяці краін паводле табліцы каэфіцыентаў УЕФА, гуляюць у групавым турніры (8 груп па 4 каманды, якія гуляюць паміж сабою ў два кругі). Па дзве найлепшыя каманды з кожнай групы, а таксама 8 клубаў, якія занялі трэцяе месца ў сваіх групах групавога этапа Лігі чэмпіёнаў, выходзяць у плэй-оф Лігі Еўропы.

Пачынаючы з сезона 2015/16, пераможца Лігі Еўропы атрымоўвае месца ў Лізе чэмпіёнаў наступнага сезона.

Пераможцы

2022/2023 — Севілья (Іспанія)
2021/2022 — Айнтрахт (Франкфурт-на-Майне, Германія)
2020/2021 — Вільярэал (Іспанія)
2019/2020 — Севілья (Іспанія)
2018/2019 — Чэлсі (Лондан, Англія)
2017/2018 — Атлетыка (Мадрыд, Іспанія)
2016/2017 — Манчэстэр Юнайтэд (Англія)
2015/2016 — Севілья (Іспанія)
2014/2015 — Севілья (Іспанія)
2013/2014 — Севілья (Іспанія)
2012/2013 — Чэлсі (Лондан, Англія)
2011/2012 — Атлетыка (Мадрыд, Іспанія)
2010/2011 — Порту (Партугалія)
2009/2010 — Атлетыка (Мадрыд, Іспанія)
2008/2009 — Шахцёр (Данецк, Украіна)
2007/2008 — Зеніт (Санкт-Пецярбург, Расія)
2006/2007 — Севілья (Іспанія)
2005/2006 — Севілья (Іспанія)
2004/2005 — ЦСКА (Масква, Расія)
2003/2004 — Валенсія (Іспанія)
2002/2003 — Порту (Партугалія)
2001/2002 — Феенорд (Ротэрдам, Нідэрланды)
2000/2001 — Ліверпул (Англія)
1999/2000 — Галатасарай (Стамбул, Турцыя)
1998/1999 — Парма (Італія)
1997/1998 — Інтэрнацыянале (Мілан, Італія)
1996/1997 — Шальке 04 (Гельзенкірхен, Германія)
1995/1996 — Баварыя (Мюнхен, Германія)
1994/1995 — Парма (Італія)
1993/1994 — Інтэрнацыянале (Мілан, Італія)
1992/1993 — Ювентус (Турын, Італія)
1991/1992 — Аякс (Амстэрдам, Нідэрланды)
1990/1991 — Інтэрнацыянале (Мілан, Італія)
1989/1990 — Ювентус (Турын, Італія)
1988/1989 — Напалі (Неапаль, Італія)
1987/1988 — Баер 04 (Леверкузен, Германія)
1986/1987 — Гётэбарг (Швецыя)
1985/1986 — Рэал Мадрыд (Іспанія)
1984/1985 — Рэал Мадрыд (Іспанія)
1983/1984 — Тотэнхэм Хотспур (Лондан, Англія)
1982/1983 — Андэрлехт (Брусель, Бельгія)
1981/1982 — Гётэбарг (Швецыя)
1980/1981 — Іпсвіч Таўн (Англія)
1979/1980 — Айнтрахт (Франкфурт-на-Майне, Германія)
1978/1979 — Барусія (Мёнхенгладбах, Германія)
1977/1978 — ПСВ (Эйндхавен, Нідэрланды)
1976/1977 — Ювентус (Турын, Італія)
1975/1976 — Ліверпул (Англія)
1974/1975 — Барусія (Мёнхенгладбах, Германія)
1973/1974 — Феенорд (Ротэрдам, Нідэрланды)
1972/1973 — Ліверпул (Англія)
1971/1972 — Тотэнхэм Хотспур (Лондан, Англія)

Найбольшую колькасць разоў (сем) турнір выйгравала іспанская «Севілья», якая таксама з’яўляецца дзейным пераможцам.

Гл. таксама

UEFA RANKINGS AND MORE…

Спасылкі

На Вікісховішчы ёсць медыяфайлы па тэме Ліга Еўропы УЕФА
Афіцыйная старонка УЕФА (англ.)