Канстанцін Лявонавіч Губарэвіч

Кастусь (Канстанцін Лявонавіч) Губарэвіч (5 студзеня 1907, в. Радучы, Чавускі раён, Магілёўская вобласць — 3 ліпеня 1987) — беларускі драматург. Заслужаны дзеяч мастацтваў Беларускай ССР (1966).

Кастусь Губарэвіч
Асабістыя звесткі
Імя пры нараджэнні	Канстанцін Лявонавіч Губарэвіч
Дата нараджэння	23 снежня 1906 (5 студзеня 1907)
Месца нараджэння	Радучы, Чавускі павет, Магілёўская губерня, Расійская імперыя
Дата смерці	3 ліпеня 1987(1987-07-03) (80 гадоў)
Грамадзянства	СССР
Альма-матар	Магілёўскі Беларускі педагагічны тэхнікум (1927) Усерасійскі дзяржаўны ўніверсітэт кінематаграфіі імя С. А. Герасімава (1932)
Месца працы	Палеская праўда[d] Беларусьфільм Першы Нацыянальны канал Беларускага радыё Літаратура і мастацтва Міністэрства культуры БССР
Прафесійная дзейнасць
Род дзейнасці	драматург, настаўнік, журналіст, сцэнарыст
Мова твораў	беларуская
Грамадская дзейнасць
Член у	Беларускі саюз кінематаграфістаў Саюз беларускіх пісьменнікаў БСТД
Прэміі	Прэмія Ленінскага камсамола Беларусі (1968)
Узнагароды

Біяграфічныя звесткі

Скончыў Магілёўскі педтэхнікум (1927), Дзяржаўны інстытут кінематаграфіі ў Маскве (1932). Настаўнічаў, працаваў у газеце «Палеская праўда», на кінафабрыцы Белдзяржкіно і Беларускім радыё, з 1949 — у газеце «Літаратура і мастацтва», на кінастудыі «Беларусьфільм», у 1966—1974 гадах у Міністэрстве культуры Беларусі.

Творчасць

У 1926 годзе дэбютаваў вершамі і апавяданнямі. Першая кніга — зборнік апавяданняў «Гайда туды і жывыя шрубы» (1930). Разам з І. Дорскім напісаў драму «Цэнтральны ход» (паст. 1948) і лірычную камедыю «Алазанская даліна» (паст. 1949). Аўтар гісторыка-рэвалюцыйных і ваенна-патрыятычных п’ес «Цытадэль славы» (паст. 1949, пад назвай «Брэсцкая крэпасць» 1953), «Простая дзяўчына» (паст. 1953), «На крутым павароце» (паст. 1956), «Галоўная стаўка» (паст. 1957), «Далёкая песня» (паст. 1962), «А куды ж нам падзецца» (паст. 1963), «Салодкі месяц» (паст. 1970), «Брэсцкі мір» (паст. 1969), «Партызанская зона» (паст. 1976), «Даруй мне» (паст. 1980) і інш., у якіх выяўляецца вастрыня і драматызм канфліктаў, дынамічнасць сюжэтаў, дакументальнасць грамадска значных фактаў. Выступаў як кінадраматург: сцэнарыі фільмаў «Баям насустрач» (1932, з Я. Гезіным і К. Мінецам), «Дзяўчынка шукае бацьку» (1958, з Я. Рысам), «Анюціна дарога» (1968), «Паланэз Агінскага» (1971), «Неадкрытыя астравы» (1973).

Прэміі і ўзнагароды

• Прэмія Ленінскага камсамола Беларусі 1968.
• Дзяржаўная прэмія Беларусі 1972.
• Ордэн Працоўнага Чырвонага Сцяга (1955).
• Ордэн Дружбы народаў (1976).
• 2 ордэны «Знак Пашаны» (1944, 1967).
• Медалі і Ганаровыя граматы.

Бібліяграфія

• П’есы. — Мн., 1969;
• Анютина дорога: Киноповести. — Мн., 1980;
• Драмы і камедыі. — Мн., 1981.

Літаратура

• Сабалеўскі А. Беларуская савецкая драма. Кн. 2. — Мн., 1972. — С. 86—118.
• Усікаў Я. Грамадзянскае сумленне мастака. — Мн., 1976. — С. 186—192;
• Гаробчанка Т. Час вымяраецца здабыткамі // Полымя. — 1976. № 12;
• Саламевіч І. У. Губарэвіч Кастусь // Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — С. 516. — 10 000 экз. — ISBN 985-11-0035-8. — ISBN 985-11-0090-0 (т. 5).
• Губарэвіч Кастусь (Канстанцін Лявонцевіч) // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 254. — 800 с. — 5 000 экз. — ISBN 985-11-0026-9.

Спасылкі

• Губарэвіч Кастусь (Канстанцін Лявонавіч) на сайце анлайн-энцыклапедыі «Беларусь у асобах і падзеях»