Каложскі дабравест
«Кало́жскі дабраве́ст» — міжнародны фестываль праваслаўных песняспеваў, які штолюты ладзіцца ў Гродне з 2002 года.
«Каложскі дабравест» | |
---|---|
Жанр | духоўная песня |
Гады правядзення | з 2002-га |
Краіна | Беларусь |
Горад | Гродна |
Мова песень | беларуская і іншыя |
Тэматыка | песня |
Лэйбл | Гродзенская епархія |
Склад удзельнікаў |
Хор Храма ўсіх святых (Мінск) |
pokrovgrodno.org/be/festival |
Суарганізатарамі фестывалю выступаюць Гродзенская епархія і Гродзенскі абласны выканаўчы камітэт пры адначасным дафінансаванні Міністэрства культуры Рэспублікі Беларусь. Адкрыццё і закрыццё прымае Гродзенскі абласны драматычны тэатр[1]. Папярэдне ў студзені праводзіцца адборачнае праслухоўванне хароў Гродзенскай епархіі. Конкурснае праслухоўванне з удзелам замежных хароў прымае сабор Пакрова Багародзіцы[2].
Лік удзельнікаў абмяжоўвалі 45 харамі. Працягласць выступу мела складаць да 20 хвілін для дарослых і да 15 хвілін для дзіцячых хароў. Песняспевы мелі ўключаць: 1) духоўныя творы беларускіх кампазітараў; 2) творы Аляксандра Архангельскага, Сяргея Рахманінава, Пятра Чайкоўскага і Паўла Часнакова (рамантычны перыяд); 3) партэсныя спевы Дзмітрыя Бартнянскага, Максіма Беразоўскага і Сцяпана Дзегцярова (харавая класіка); 4) хатнія спевы; 5) распеў не ў гарманізацыі — балгарскі, грэчаскі, знакавы, кіеўскі або хатні[3].
Намінацыі правіць
На 2021 год на «Каложскім дабравесце» прысуджалі ўзнагароды ў 8 намінацыях:
- царкоўныя хары епархіі і раённых цэнтраў (ад 9 чалавек);
- царкоўныя ансамблі епархіі (да 8 чалавек);
- царкоўныя хары (ад 12 чалавек) і ансамблі (да 12 чалавек) абласных гарадоў;
- хары святароў і духоўных школ;
- свецкія прафесійныя гурты;
- свецкія аматарскія гурты;
- дзіцячыя царкоўныя гурты;
- дзіцячыя свецкія гурты[4].
Журы правіць
На 2021 год міжнароднае журы «Каложскага дабравесту» з 10 асоб ад пачатку ўзначальваў клірык сабору Пакрова Багародзіцы Андрэй Бандарэнка. У склад журы ўваходзіў старшыня аргкамітэта фестывалю Анатоль Ненартовіч, які ўзначальваў царкву Сабору ўсіх беларускіх святых, а таксама музыказнаўцы і святары з 6 краін Еўропы: Латвіі, Польшчы, Расіі, Румыніі, Украіны і Францыі[5].
Гісторыя правіць
У 2002 годзе ў Гродне прайшоў 1-ы фестываль «Каложскi дабравест», прымеркаваны да 10-годдзя адраджэння Гродзенскай епархіі. У лютым 2008 года 7-ы абласны фестываль праваслаўных песняспеваў, які ў той год атрымаў назву «Каложскі дабравест», сабраў 39 царкоўных і свецкіх хароў з 6 краін Еўропы — Беларусі, Літвы, Польшчы, Расіі, Украіны і Сербіі. У склад журы ўвайшлі прадстаўнікі 4-х краін. Нязменным старшынёй журы быў святар і кампазітар Андрэй Бандарэнка. Пасля дня Божага Нараджэння цягам калядных святаў журы адбірала ўдзельнікаў фестывалю сярод усіх царкоўнапрыходскіх хароў Гродзенскай вобласці. Свецкія хоры дасылалі заяўкі на ўдзел самі. У межах «Каложскага дабравесту» ладзілі навуковую канферэнцыю з удзелам спецыялістаў Мікалай Шыманскага з Мінска і Мікалая Дзянісава з Масквы. Працягласць фестывалю павялічылі да 4-х дзён за кошт урачыстага адкрыцця з гала-канцэртам. Пастаяннымі членамі журы былі начальнікі ўпраўлення культуры Гродзенскага аблвыканкама Аляксандр Лойка і кіраўнік Гайнаўскага фестывалю на Падляшшы пратаярэй Міхаіл Нігярэвіч. Членам аргкамітэта фестывалю быў начальнік аддзела ў справах рэлігій і нацыянальнасцей Гродзенскага аблвыканкама Ігар Папоў. З Літвы прыехаў хор Клайпедскага дабрачыння «Іверская свечка» пры Свята-Мікалаеўскай царкве ў Цельшах. З Сербіі — хор Дзбюрдава. У рамках фестывалю ў Гарадской выставачнай зале Гродна правялі фотавыставу «Праваслаўны храмы Гродзеншчыны». Гала-канцэрт закрыцця прайшоў з аншлагам. Спаборніцтва праходзіла ў намінацыях сярод хароў святароў і духоўных школ, царкоўных ансамбляў Гродзенскай епархіі, дзіцячых царкоўных калектываў, а таксама свецкіх аматарскіх асобна для дарослых і дзіцяча-юнацкіх. Пераможцаў узнагароджвалі тэлевізарамі, магнітафонамі і прагравальнікамі лічбавых відэадыскаў. Галоўную ўзнагароду атрымаў Нацыянальны акадэмічны народны хор Беларусі імя Генадзя Цітовіча пад кіраўніцтвам Міхася Дрынеўскага, які выканаў творы беларускіх кампазітараў Аляксея Туранкова, Мікалая Шчаглова, Андрэй Бандарэнкі і Мікалая Бутомы[6].
8—21 лютага 2009 года на 8-ы фестываль «Каложскі дабравест» завіталі звыш 40 хароў з суседніх Літвы, Польшчы, Расіі і Украіны. Ад Беларусі выступілі хор тэалагічнага факультэта БДУ, прыходскія хоры епархій Беларусі і хоры з Брэста, Оршы і Гомлю. У склад журы ўвайшлі іерэй Андрэй Бандарэнка, народны артыст Міхась Дрынеўскі, мастацкі кіраўнік Міжнароднага харавога фестывалю ў Эстоніі Валерый Пятроў, сакратар Саюза кампазітараў Украіны Іван Тараненка і расійскі кампазітар Мікалай Дзянісаў. Заключны гала-канцэрт у зале Гродзенскага абласнога драматычнага тэатра прайшоў з аншлагам. Узнагароды атрымалі хоры з Гродна, Калініграда і Луцка (Валынская вобласць)[7].
10—13 лютага 2010 года ў 9-м фестывалі «Каложскі дабравест» удзельнічалі 39 хароў з Беларусі і суседніх Літвы, Польшчы, Расіі і Украіны. Упершыню завіталі жаночы ансамбль манастыра святога Герарда ў Ерэване (Арменія) і хор «Бранка» сабора ў Нішы (Сербія). На канцэртах фестывалю выступілі Дзяржаўны камерны хор Беларусі, Нацыянальны акадэмічны народны хор імя Цітовіча і хор святароў Гродзенскай епархіі пад кіраўніцтвам Андрэя Бандарэнкі[8]. Галоўную ўзнагароду атрымаў хор манастыра святога Герарда пад кіраўніцтвам Мгера Наваяна[9].
16—19 лютага 2011 года адбыўся 10-ы фестываль «Каложскі дабравест», які адкрываў Міхась Дрынеўскі[10]. У 2011 годзе фестываль атрымаў званне міжнароднага ад Міністэрства культуры Рэспублікі Беларусь. У лютым 2012 года 11-ы фестываль сабраў 45 хароў з 8 краін Еўропы — Беларусі, Грэцыі (упершыню), Літвы, Польшчы, Расіі, Румыніі, Сербіі і Украіны. Узнагароды прысудзілі ў 3-х ступенях па 9 намінацыях. Галоўную ўзнагароду атрымаў дзіцячы хор «Натхненне» музычна-харавой школы № 106 у Маскве (Расія), якім кіравала Вольга Скварцова[11]. Пераможцаў уганаравалі бронзавай статуэткай у выглядзе сімвала фестывалю, выкананай скульптарам Уладзімірам Панцялеевым. Спадарожна праводзіліся вечары паэзіі, выставы і кіналекторыі[12]. Фестываль «Каложскі дабравест» фінансавалі Гродзенскі аблвыканкам і Гродзенская епархія[13].
27 лютага — 2 сакавіка 2013 года прайшоў 12-ы «Каложскі дабравест». Папярэдне ў студзені падчас калядных святаў зладзілі адбор сярод прыходскіх хароў Гродзенскай епархіі. З-за мяжу да ўдзелу запрасілі хары з 7 краін Еўропы — Літвы, Польшчы, Расіі, Румыніі, Сербіі і Францыі. Агулам у фестывалі ўдзельнічала 45 хароў. Пераважна выконваліся творы беларускіх аўтараў і мясцовых напеваў, а таксама знакавы, шляхавы, хатні, кіеўскі, балгарскі і грэчаскі распеў, як і штодзённы песняспеў. Спадарожна праводзіліся: выстаўка з фондаў Гродзенскага дзяржаўнага музея гісторыі рэлігіі, вечар духоўнай паэзіі і аўтарскай песні, кіналекторый, мастацкія выставы ў Гродзенскай выставачнай залі і музеі Гродзенскага абласнога метадычнага цэнтра народнай творчасці, а таксама фотавыстава «Праваслаўны свет». 28 лютага ладзілі канцэрт студэнцкага хору Маскоўскай дзяржаўнай кансерваторыі (Расія), а 1 сакавіка — Архірэйскага хору сабору Аляксандра Неўскага ў Парыжы (Францыя) і хору спеўных стараверскіх прыходаў Сібіры[14].
19—22 лютага 2014 года адбыўся 13-ы «Каложскi дабравест»[15]. У фестывалі прынялі ўдзел 37 хароў з 6 краін[16]. Адкрыццё і закрыццё правялі ў Гродзенскім абласным драмтэатры, а спаборнае праслухоўванне — у саборы Пакрова Багародзіцы. 20—21 лютага ў Гродзенскім музычным каледжы і Новым замку ладзілі канцэрты хароў з Арменіі, Расіі і Украіны. У спаборніцтве ўдзелічалі 4 хары з Расіі, 3 з Польшчы, 2 з Украіны і па 1 з Арменіі і Румыніі[17]. На адкрыцці выступіў студэнцкі хор Маскоўскай кансерваторыі пад кіраўніцтвам Станіслава Калініна. Ладзіліся фотавыстава «Нашыя храмы» фотаклуба «Гродна», асабістая фотавыстава Уладзіміра Лябецкага «Праваслаўная Сербія вачыма беларусаў» і выстаўка абразоў Міколы Цудатворцы ў Гродзенскім музеі рэлігіі. У закрыцці ўзяў удзел беларускі экзарх Павел[18]. Таксама ладзілі кінапаказы фільмаў «Вялікі пост» і «Ікона». У межах фестывалю прадставілі кнігу Ларысы Густавай «Царкоўны спевы. Беларуская спеўная культура праваслаўнай традыцыі»[19]. Сярод іншага выступілі мужчынскі хор стараабрадніцкага сабора Пакрова Багародзіцы ў Маскве і жаночы хор «Аватамк» царквы Рыгора Асветніка Эміядзінскага манастыра (Арменія)[20]. Галоўную ўзнагароду атрымаў студэнцкі хор Казанскай дзяржаўнай кансерваторыі (Рэспубліка Татарстан, Расія).
11—14 лютага 2015 года «Каложскі дабравест» сабраў 20 хароў з Беларусі і яшчэ 20 з 6 іншых краін Еўропы — Літвы, Малдовы (упершыню, свецкі і царкоўны), Польшчы, Расіі, Румыніі і Украіны. Сярод іншых запрасілі студэнцкі хор Беларускай дзяржаўнай акадэміі музыкі і хор «За веру і айчыну» інжынерных войскаў Расіі. 8—12 студзеня праводзілі адборачнае праслухоўванне хароў Гродзенскай епархіі ў Свіслачы, Росі (Ваўкавыскі раён), Мастах і Азёрах (Гродзенскі раён). Спадарожна ў Каложскай царкве Барыса і Глеба праходзіла выстаўка сучасных абразоў з Беларусі, Літвы, Польшчы і Украіны. Таксама прадставілі альбом Алёны Шацько «Званы праваслаўных храмаў Заходняй Беларусі». У склад журы ўвайшлі выкладнікі і святары Беларусі, Расіі, Румыніі і Францыі. Пераможцаў вызначалі ў 8 намінацыях[21].
25—27 лютага 2016 года на 15-ы «Каложскі дабравест» завіталі 35 хароў з Арменіі, Беларусі, Малдовы, Польшчы, Расіі, Сербіі, Узбекістана (упершыню) і Францыі. З Ташкента прыехаў хор сабора Успення Багародзіцы[22]. 6—11 лютага 2017 года на 16-м фестывалі выступіла 38 хароў з 7 краін[23] — Арменіі, Беларусі, Польшчы, Расіі, Румыніі, Сербіі і Украіны[24]. Спадарожна ў Гродзенскім абласным метадычным цэнтры народнай творчасці прайшла выстаўка графікі, керамікі і жывапісу «Прыгажосць Боскага свету», якую ладзіў Цэнтр творчасці дзяцей і моладзі «Прамень» Кастрычніцкага раёна Гродна[25]. Галоўную ўзнагароду атрымаў Акадэмічны хор Расійскай акадэміі музыкі з Масквы пад кіраўніцтвам Дзмітрыя Анегіна. Таксама лаўрэатамі сталі 9 хароў Гродзенскай вобласці[26]. У Сеціве спевы хароў паглядзела звыш 5000 чалавек[27].
7—10 лютага 2018 года на 17-ы «Каложскі дабравест» завіталі 35 хароў з 8 краін — Беларусі, Македоніі (упершыню), Польшчы, Расіі, Румыніі, Узбекістана, Украіны і Чарнагорыі (упершыню). Сярод іншага выступіла 10 дзіцячых хароў[28]. 20—23 лютага 2019 года ў 18-м фестывалі ўзялі ўдзел звыш 40 хароў з 8 краін — Беларусі, Латвіі (упершыню), Літвы, Польшчы, Расіі, Румыніі, Сербіі і Украіны[29]. На адкрыцці выступіла Дзяржаўная акадэмічная харавая капэла імя Рыгора Шырмы[30]. Перамогу на спаборніцтве здабыў Усіхсвяцкі хор Храма ўсіх святых у Мінску[31].
19—22 лютага 2020 года 19-ы фестываль сабраў 37 хароў з 11 краін, у тым ліку ўпершыню з Нідэрландаў, Фінляндыі і Эстоніі. У папярэднім адборы ўзялі ўдзел звыш 800 хароў[32]. Кіраўніцай фестывалю выступіла Наталля Гаплінчык[33]. Сярод іншага ў межах фестывалю святар Павел Каспяровіч прадставіў зборнік беларускай паэзіі «Каложскі дабравест» пад рэдакцыяй Анатоля Брусевіча. Зборнік уключыў вершы 9 паэтак і паэтаў, у тым ліку такіх як Данута Бічэль, Юрка Голуб, Андрэй Мельнікаў, Ала Нікіпорчык, Рычард Белячыц, Аліна Паўлоўская і манах Ян Бембель пад псеўданімам Зніч[34].
Галоўная ўзнагарода правіць
Год | № | Хор | Краіна |
2020 | 19 | ||
2019 | 18 | Хор Храма ўсіх святых (Мінск) | Беларусь |
2018 | 17 | ||
2017 | 16 | Акадэмічны хор Расійскай акадэміі музыкі (Масква) | Расія |
2016 | 15 | ||
2015 | 14 | ||
2014 | 13 | Студэнцкі хор Казанскай дзяржаўнай кансерваторыі (Татарстан) | Расія |
2013 | 12 | ||
2012 | 11 | «Натхненне» музычна-харавой школы № 106 (Масква) | Расія |
2011 | 10 | ||
2010 | 9 | Хор манастыра святога Герарда (Ерэван) | Арменія |
2009 | 8 | — | |
2008 | 7 | Народны хор імя Цітовіча | Беларусь |
2007 | 6 | ||
2006 | 5 | ||
2005 | 4 | ||
2004 | 3 | ||
2003 | 2 | ||
2002 | 1 |
Зноскі
- ↑ "У Гародні — апошні дзень XIV фестывалю «Каложскі дабравест»". Радыё «Рацыя». люты 2015. Праверана 6 студзеня 2021.
{{cite news}}
: Праверце значэнне даты ў:|date=
(даведка) Архівавана 9 лістапада 2021. - ↑ Якуб Сушчынскі (люты 2020). "«Каложскі дабравест» адбудзецца ў Гародні". Радыё «Рацыя». Праверана 6 студзеня 2021.
{{cite news}}
: Праверце значэнне даты ў:|date=
(даведка) Архівавана 9 лістапада 2021. - ↑ "Палажэнне аб міжнародным фестывалі «Каложскі дабравест»" [руская]. Гродзенская епархія. 17 чэрвеня 2019. Праверана 6 студзеня 2021. Архівавана 9 лістапада 2021.
- ↑ "Гісторыя фестывалю «Каложскі дабравест»" [руская]. Гродзенская епархія. 2021. Праверана 6 студзеня 2021. Архівавана 9 лістапада 2021.
- ↑ "Міжнароднае журы фестывалю «Каложскі дабравест»" [руская]. Гродзенская епархія. 6 верасня 2019. Праверана 6 студзеня 2021. Архівавана 9 лістапада 2021.
- ↑ Надзея Бунцэвіч. «Каложскi дабравест»: курс на Усход і на Захад // Культура : газета. — 15 сакавіка 2008. — № 11 (829).
- ↑ Аляксандра Дубравіна. Склікае Каложа // Культура. — 28 лютага 2009. — № 9 (877).
- ↑ Песню пяе Каложа // Культура. — 13 лютага 2010. — № 7 (927).
- ↑ "Хор манастыра Герарда атрымаў Гран-пры на фестывалі духоўнай музыкі ў Беларусі" [руская]. Вікінавіны. 19 лютага 2010. Праверана 5 студзеня 2021.
- ↑ Надзея Бунцэвіч. Метрыка для песні // Культура. — 12 лютага 2011. — № 7 (979).
- ↑ Дар’я Чаркес. «Натхненне» на «Дабравесце» // Культура. — 10 сакавіка 2012. — № 10 (1033).
- ↑ Алена Стасюкевіч (27 лютага 2012). "Уладальнікам Гран-пры «Каложскага дабравеста» стаў дзіцячы хор з Масквы". Беларускае тэлеграфнае агенцтва. Праверана 6 студзеня 2021.
- ↑ Яўген Рагін. У грыбы на бібліёбусе // Культура. — 12 студзеня 2013. — № 2 (1076).
- ↑ Алена Стасюкевіч (13 лютага 2013). "Фестываль праваслаўных песняспеваў «Каложскі дабравест» збярэ ў Гродне калектывы з 8 краін". БелТА. Праверана 6 студзеня 2021.
- ↑ Коратка // Звязда : газета. — 13 снежня 2013. — № 235 (27600). — С. 1. — ISSN 1990-763x.
- ↑ "Сёння стартуе міжнародны фестываль праваслаўных песняспеваў «Каложскі дабравест»". Белтэлерадыёкампанія. 19 лютага 2014. Праверана 6 студзеня 2021.
- ↑ "У XIII Міжнародным фестывальывалі праваслаўных песняспеваў прымуць удзел калектывы з шасці краін". Газета «Звязда». 6 лютага 2014. Праверана 6 студзеня 2021.
- ↑ Аляксандр Саенка (20 лютага 2014). "У Гродне ўрачыста адкрыўся XIII Міжнародны фестываль праваслаўных спеваў «Каложскі звон»". БелаПАН. Праверана 6 студзеня 2021.
- ↑ Барыс Пракопчык. Песняспевы «Каложскага дабравеста» // Звязда. — 18 лютага 2014. — № 30 (27640). — С. 5.
- ↑ "На «Каложскім дабравесце» выступілі хоры стараабраднікаў і Армянскай царквы". Газета «Новы час». 23 лютага 2014. Праверана 6 студзеня 2021.
- ↑ Тацяна Вішнеўская (6 студзеня 2015). "Фестываль праваслаўных песняспеваў «Каложскі дабравест» адбудзецца 11-14 лютага ў Гродне". БелТА. Праверана 6 студзеня 2021.
- ↑ Тэлеканал «Беларусь 1» (25 лютага 2016). "У Гродне адкрыўся міжнародны фестываль праваслаўных спеваў «Каложскі дабравест»". Белтэлерадыёкампанія. Праверана 6 студзеня 2021.
- ↑ Таццяна Вішнеўская (9 лютага 2017). "Фестываль «Каложскі дабравест» праходзіць у Гродне". БелТА. Праверана 6 студзеня 2021.
- ↑ Тэлеканал «Беларусь 1» (11 лютага 2017). "Дайджэст навін рэгіёнаў". Белтэлерадыёкампанія. Праверана 6 студзеня 2021.
- ↑ Яўген Рагін. Пра краязнаўчы факультатыў, маладзёжную сталіцу і «Святкі.by» // Культура. — 4 лютага 2017. — № 5 (1288).
- ↑ Мікалай Шаўчэнка. Пра «Скарбніцу Падняпроўя», ДК на колах і нішчымны пірог // Культура. — 18 лютага 2017. — № 5 (1290).
- ↑ Якуб Сушчынскі (люты 2017). "«Каложскі дабравест – 2017»". Радыё «Рацыя». Праверана 6 студзеня 2021.
{{cite news}}
: Праверце значэнне даты ў:|date=
(даведка) Архівавана 9 лістапада 2021. - ↑ "«Каложскі дабравест» сабраў у Гродне калектывы з 8 краін". БелТА. 9 лютага 2018. Праверана 6 студзеня 2021.
- ↑ Яўген Рагін. Нам, царам, бяз юшкі аніяк // Культура. — 16 лютага 2019. — № 7 (1394).
- ↑ Леанід Шчаглоў (20 лютага 2018). "XVIII Міжнародны фестываль праваслаўных песнапенняў «Каложскі дабравест» адкрыўся ў Гродне". БелТА. Праверана 6 студзеня 2021.
- ↑ Вікторыя Захарава. Усе хары ў госці да нас // Ігуменскі тракт. — 4 лютага 2020. — № 2 (245).
- ↑ Ала Бялькевіч. «Каложскі дабравест»: музыка па-за часам // Культура. — 25 студзеня 2020. — № 4 (1443).
- ↑ "Фестываль «Каложскі дабравест» у Гродне будзе рэкордным па колькасці краін-удзельніц". БелТА. 14 лютага 2018. Праверана 6 студзеня 2021.
- ↑ Якуб Сушчынскі (люты 2020). "Новы зборнік беларускай паэзіі «Каложскі дабравест»". Радыё «Рацыя». Праверана 6 студзеня 2021.
{{cite news}}
: Праверце значэнне даты ў:|date=
(даведка) Архівавана 9 лістапада 2021.
Спасылкі правіць
- "Каложскі дабравест". Газета «Новы час». 23 сакавіка 2018. Праверана 6 студзеня 2021.
- "Фотафакт: фестываль «Каложскі дабравест» у Гродне". Беларускае тэлеграфнае агенцтва. 20 лютага 2020. Праверана 6 студзеня 2021.
- "Фестываль «Каложскі дабравест»" [руская]. Гродзенская епархія. 17 чэрвеня 2020. Праверана 6 студзеня 2021. Архівавана 9 лістапада 2021.
- Заяўкі на ўдзел Архівавана 7 студзеня 2021. (руск.)
- Навіны Архівавана 24 студзеня 2021.
- Аўдыёзапісы Архівавана 20 студзеня 2021.
- "Хор". Каложская царква Барыса і Глеба ў Гродне. 11 лютага 2017. Праверана 6 студзеня 2021. Архівавана 9 лістапада 2021.