ULIS

ULIS (маўленне Улі́с) — беларускі рок-гурт. Заснаваны ў 1988 годзе.

ULIS
Жанр	Раней: рок, новая хваля, псіхадэлік-рок Пазней: альтэрнатыўны рок, фанк-рок, прагрэсіўны рок, альтэрнатыўны метал
Гады	з 1988
Краіна	Беларусь
Горад	Мінск
Мова песень	беларуская, англійская
Лэйблы	Мелодыя, Каўчэг, БМАgroup, Саціс, Polskie Nagrania
Склад	Слава Корань, Віктар Самарукаў, Павел Ярмачэнка, Наталля Куніцкая
Іншыя праекты	Бонда
ulis.by

Гісторыя

Пасля расколу ў 1988 годзе залатога складу беларускага рок-гурта Бонда з яго сыходзяць гітарыст Вячаслаў Корань і басіст Сяргей Краўчанка, адначасова яны ствараюць новы калектыў, які на пачатку 1989 года займеў назву ULIS. У хуткім часе да гурта далучаюцца некаторыя былыя ўдзельнікі Бонды і іншыя музыкі — перкусіяніст Валерый Цініцкі, ударнік Кірыл Шэвандо (у 1990 годзе яго замяняе Сяржук Кныш), вакалістам становіцца Андрэй Патрэй, аўтарам тэкстаў выступае Фелікс Аксёнцаў.

Першы выступ новага гурта на фестывалі «Тры колеры» адразу прынёс поспех — ULIS займае другое месца (саступіўшы толькі Мроі). Дэбютны альбом запісваўся ў 1989 годзе ў польскім горадзе Ольштын (запісваў вядомы польскі гукарэжысёр Рычард Шміт). За тры дні працы ў студыі было запісана 11 песень, аднак на першы альбом пад назвай «Чужаніца» трапілі толькі 8. Там жа, у Ольштыне, быў выдадзены невялікі наклад альбома у 100 аўдыёкасет. Альбом быў перавыдадзены на вініле ў 1991 годзе фірмай Мелодыя (аўтарам вокладкі выступіў Міхал Анемпадыстаў), у 1996 годзе зноў перавыдадзены на кампакт-касеце мінскай кампаніяй Каўчэг.

Неўзабаве ў Ольштыне запісваецца другі альбом, які выдаецца ў 1991 годзе на вініле пад назвай «Краіна доўгай белай хмары» (выдавец Polskie Nagrania), альбом перавыдадзены ў 1996 годзе кампаніяй Каўчэг.

Пад канец 1991 года гурт пакідае вакаліст Андрэй Патрэй, якога замяняе Алег Тумашоў, таксама сыходзіць перкусіяніст Валерый Цініцкі. Аднак гэта не перашкаджае запісаць у 1993 годзе новы альбом «Танцы на даху», які быў выдадзены на кампакт-касеце. У лютым таго ж года выдаецца англійскамоўная версія праграмы «Dances On The Roof».

У 1994 годзе адбыўся раскол гурта, падчас якога з ULIS сышлі ўсе музыкі, апроч Славы Кораня, які ўзяў на сябе функцыі вакаліста і аўтара тэкстаў.

Нягледзячы на страту асноўнага складу, гурт працягвае актыўную дзейнасць. У 1995 годзе Слава Корань разам з Аляксеем Паўловічам (бас-гітара) запісвае новы альбом «Па-над дахамі». Праз год да калектыва далучаюцца Ягор Марачук і Алег Дземідовіч. У 1996 годзе Каўчэг выпускае на кампакт-касетах альбомы «Life 1996» (аўтар тэкстаў Лявон Вольскі) і «Блуканьне». У тым жа 1996 запісваецца праграма «Ратуйце вашыя душы», якую ў 1997 годзе выпускае на кампакт-касетах кампанія Саціс. У 1997 годзе склад ULIS зноў кардынальна змяніўся: Слава Корань (гітара, спеў, тэксты і музыка), Віктар Самарукаў (бас-гітара), Аляксандр Быкаў (ударныя).

У 1998 годзе БМАgroup выдае два CD з лепшымі творамі калектыва.

У 1999 годзе Каўчэг выпускае альбом «Падарожжа». У 2003 годзе выдаецца апошні на сёння альбом «Люстэрка», у які ўвайшлі новыя аранжыроўкі старых хітоў гурта, тры песні на вершы Уладзіміра Караткевіча, кавер на песню «Апавяданьне пра маю вуліцу» польскага гурта Aya RL. У 2001 годзе па выніках выступлення на «Басовішчы» гурт атрымоўвае прэмію ад галаўнога офіса «Беларускага Радыё Рацыя».

У 2007 годзе ULIS меў наступны склад: Слава Корань, Віктар Самарукаў, Павел Ярмачэнка (ударныя), Наталля Куніцкая (клавішы). Пасля апошняга студыйнага рэлізу ULIS амаль спыніў канцэртную дзейнасць, апошнімы вядомымі канцэртамі сталі выступы ў Чарнігаве (фестываль «Be Free») і ў Полацку. Фронтмэн калектыва Слава Корань апошнім часам жыве ў Польшчы, басіст Віктар Самарукаў — у Канадзе. Аднак, як сцвярджае лідар гурта, ULIS працягвае сваё існаванне і пачне ствараць новую праграму па вяртанні басіста на радзіму.

Гурт ULIS праводзіў актыўную канцэртную дзейнасць. Ён выступаў у Беларусі, Расіі, Украіне, Польшчы, Эстоніі, Германіі, Вялікабрытаніі. ULIS з’яўляліся ўдзельнікамі шэрагу музычных фестываляў і супольных канцэртаў: «Тры колеры» (Мінск, 1989-1990), «Сырок» (Масква, 1990) «Рок-немаўля» і «Вольныя танцы» (Маладзечна), «Рок па вакацыях», «Рок-Купалле» і «Любі сапраўднае» (Мінск, 1998), «Салідарныя з Беларуссю» (Польшча, 2006), «Be Free» (Чарнігаў, 2007-2009) і іншыя.

Дыскаграфія

• «Чужаніца» (1989)
• «Краіна доўгай белай хмары» (1990)
• «Танцы на даху» (1993)
• «Па-над дахамі» (1995)
• «Life 1996» (1996)
• «Блуканьне» (1996)
• «Ратуйце вашыя душы» (1997)
• «Падарожжа» (1999)
• «Lusterka» (2003)

Удзел у зборніках

• Budzma The Best Rock / Budzma The Best Rock/New (2009) — «Padarožža», «Ja Tanču»

Склад

• Слава Корань — спеў, гітара, аўтар тэкстаў і музыкі, гукарэжысёр (1989 — наш час)
• Віктар Самарукаў — бас-гітара (1997 — наш час)
• Павел Ярмачэнка — ударныя (2004 — наш час)
• Наталля Куніцкая — клавішныя (2004 — наш час)

Былыя ўдзельнікі

• Фелікс Аксёнцаў — аўтар тэкстаў (1989—1994)
• Аляксандр Быкаў — ударныя (1997—2004)
• Лявон Вольскі — тэксты (1995)
• Алег Дземідовіч — ударныя (1996)
• Сяржук Кныш — ударныя (1990—1994)
• Сяржук Краўчанка — бас-гітара (1989—1994)
• Ягор Марачук — гітара (1996—1997)
• Таццяна Мархель — народныя спевы (1990)
• Ігар Маскаленка — ударныя (1995)
• Андрэй Патрэй — спеў (1989—1990)
• Лёша Паўловіч — бас-гітара (1995—1997)
• Алег Тумашоў — спеў (1991—1994)
• Валерый Цініцкі — перкусія (1989—1990)
• Кірыла Шэвандо — ударныя (1989)
• Сяргей Кісялёў — бас-гітара

Храналогія

Літаратура

• Д.П. «УЛІС» // Энцыклапедыя беларускай папулярнай музыкі (бел.) / уклад. Дз. Падбярэзскі і інш. — Мінск: Зміцер Колас, 2008. — С. 310–311. — 368 с. — 2 000 экз. — ISBN 978-985-6783-42-8.

Спасылкі

• Сайт гурта Архівавана 4 лютага 2007.
• Старонка гурта на Last.fm
• Старонка гурта Укантакце
• Слава Корань: «Калі-небудзь тут пачнецца нармальнае жыцьцё» / Experty.by
• Слава Корень: «Изо рта неделю тройным одеколоном несло» / Experty.by
• Слава Корень: «Все белорусские музыканты находятся в процессе учёбы» / Ultra-music.com
• ВЫКЛАДЗЕНАЯ ЗАБЫТАЯ ФОТАСЭСІЯ КЛЯСЫЧНАГА СКЛАДУ ГУРТА ULIS (ФОТА) / Тузін гітоў