ФК Энергетык-БДУ

«Энергетык-БДУ» — беларускі футбольны клуб з Мінска, прадстаўляе Рэспубліканскі цэнтр алімпійскага рэзерву Беларускага дзяржаўнага ўніверсітэта (раней таксама Ваенную акадэмію). У цяперашні час выступае ў Першай лізе чэмпіянату Беларусі.

Энергетык-БДУ
Мянушкі	студэнты, армейцы
Заснаваны	1996
Горад	Мінск, Беларусь
Стадыён	РЦАР-БДУ Умяшчальнасць: 1500
Дырэктар	Аляксандр Захарчэня
Галоўны трэнер	Аляксей Мяркулаў
Чэмпіянат	Першая ліга
2023	▼ 14 месца ў Вышэйшай лізе, паражэнне ў стыкавых матчах
Асноўная форма Гасцявая форма

Гісторыя

Клуб быў заснаваны ў 1996 годзе і заявіўся ў Другую лігу пад назвай «Зорка», адкуль праз некалькі гадоў павысіўся спачатку да Першай, а потым і да Вышэйшай лігі. У эліце беларускага футбола клуб правёў чатыры гады, увесь час знаходзіўся ў зоне вылету і нарэшце вярнуўся ў Першую, а потым і ў Другую лігу, дзе выступаў з 2008 па 2013 гады.

2013

У сезоне 2013 клуб вёў барацьбу за выхад у Першую лігу, але ў канцы сезона саступіў другі радок мастоўскаму «Нёману», а сам апынуўся на трэцім месцы. Тым не менш, пасля адмовы «Нёмана» ад павышэння ў лютым 2014 года мінчане ўсё ж такі атрымалі магчымасць выступіць у Першай лізе. У сакавіку 2014 года «Зорка-БДУ» афіцыйна атрымала месца ў другім па рангу дывізіёне.

2014

У сезоне 2014 склад каманды амаль не змяніўся ў параўнанні з папярэднім. Стаўка рабілася на ўласных маладых выхаванцаў. Калі не лічыць капітана каманды, вопытнага Валерыя Апанаса, то ўзрост ігракоў не пераўзыходзіў 27 гадоў (а пасля зыходу ўлетку 2014 года з каманды лідараў — Сяргея Русецкага і Аляксея Хадневіча — увогуле 23 гадоў). Доўгі час каманда знаходзілася ўнізе турнірнай табліцы. Але, набраўшыся вопыту, маладыя ігракі бліжэй да канцу чэмпіянату сталі набіраць усё больш ачкоў, і ў выніку каманда скончыла сезон на 9 месцы. Пры гэтым, па колькасці забітых галоў (50 у 30 турах) «Зорка-БДУ» апынулася на другім месцы ў лізе пасля мазырскай «Славіі».

2015

У сезоне 2015 склад каманды папоўніў шэраг вопытных ігракоў, як Юрый Мархель, Аляксандр Быліна, вярнуліся Сяргей Русецкі і Аляксей Хадневіч. Сезон каманда пачала ўпэўнена і ішла сярод лідараў, але потым гульня пайшла на спад, і сезон «Зорка-БДУ» скончыла на 10-м месцы.

2016

У сезоне 2016 «Зорка-БДУ» зноў амаладзіла склад — ветэраны пакінулі каманду, за якую сталі выступаць у асноўным ігракі 1997 года нараджэння і маладзейшыя. Каманда доўгі час ішла ў сярэдзіне табліцы, аднак няўдалы фініш адкінуў яе на 10-е месца з 14.

2017

У пачатку 2017 года на чале каманды стаў трэнерскі дуэт Уладзіміра Бяляўскага і Анатоля Юрэвіча, які падоўжыў камплектаванне каманды ўласнымі маладымі выхаванцамі, запрасіўшы ў склад некалькі вопытных ігракоў. У сакавіку 2017 года стала вядома, што каманда, якая доўгі час была вядома як «Зорка-БДУ», змяніла назву на «Энергетык-БДУ». Пасля няўдалага пачатку каманда стала набіраць ачкі, першую палову чэмпіянату «Энергетык-БДУ» скончыў на пятым месцы. Пазней справы пайшлі горш, і клуб апусціўся ў сярэдзіну табліцы, аднак паспяховы фініш дазволіў атрымаць выніковы шосты радок.

2018

У сезоне 2018 каманда працягвала стаўку на ўласных выхаванцаў, хоць некаторыя з іх і былі запрошаны ў клубы Вышэйшай лігі. З самага пачатку турніру «Энергетык-БДУ» ўпэўнена ішоў па дыстанцыі і апынуўся сярод лідараў. Барацьба з мазырскай «Славіяй» і бабруйскай «Белшынай» скончылася для сталічнага клуба другім месцам і вяртаннем у Вышэйшую лігу праз трынаццаць гадоў.

2019

Перад пачаткам сезона ў Вышэйшай лізе «Энергетык-БДУ» захаваў асноўных ігракоў, запрасіўшы таксама шэраг маладых футбалістаў, а таксама легіянераў. Каманда гуляла ў атакуючы футбол, забівала шмат галоў, аднак пры гэтым яшчэ больш прапускала. Доўгі час «Энергетык-БДУ» знаходзіўся ў канцы табліцы, змагаючыся за захаванне месца ў элітным дывізіёне, аднак паспяховы фініш дазволіў камандзе заняць выніковае дванаццатае месца. Нападнік «Энергетыка-БДУ» Ілья Шкурын з дзевятнаццаццю галамі стаў найлепшым бамбардзірам лігі.

2020

У 2020 годзе ў сувязі з новымі правіламі АБФФ каманда мусіла з мая праводзіць дамашнія матчы на пляцоўцы з натуральным пакрыццём, а паколькі стадыён РЦАП-БДУ не падыходзіў, то свае матчы «Энергетык-БДУ» праводзіў на гарадскім стадыёне ў Маладзечне. Каманда добра пачала сезон, ішла сярод лідараў турніру. Летам каманду пакінулі лідары, Жасурбек Яхшыбоеў і Дэвід Твэ, якія перайшлі ў салігорскі «Шахцёр» і брэсцкае «Дынама» адпаведна. У другой палове сезона «Энергетык-БДУ» стаў часцей цярпець паражэнні, у выніку апынуўся ў сярэдзіне табліцы і скончыў сезон на 10-м месцы, якое тым не менш стала найлепшым у гісторыі.

У снежні 2020 года памёр заснавальнік і нязменны кіраўнік клуба Уладзімір Пігулеўскі.

2021

У сезоне 2021 каманда працягвала рабіць стаўку на іншаземных (пераважна ўзбекскіх і афрыканскіх), а таксама маладых беларускіх ігракоў. З мая дамашнія матчы клуб праводзіў на гарадскім стадыёне ў Барысаве. Большую частку сезона «Энергетык-БДУ» знаходзіўся ў ніжняй палове табліцы, у канцы нават трапляў у зону вылету, але скончыў сезон на 13-м месцы.

2022

У пачатку 2022 года клуб пакінулі лідары, якіх замянілі маладыя выканаўцы, таксама былі запрошаны футбалісты з Узбекістана. У лютым клуб пакінуў галоўны трэнер Уладзімір Бяляўскі, на яго месца заступіў Павел Раднёнак (пры гэтым фактычна падчас матчаў гульнёй кіраваў Аляксандр Паўлаў, а агулам за трэніровачным працэсам працягваў наглядаць Анатоль Юрэвіч). У чэмпіянаце клуб выступаў паспяхова і хутка апынуўся сярод лідараў, да канца сезона змагаўся за першы радок. У выніку «Энергетык-БДУ» сенсацыйна заваяваў сярэбраныя медалі, а нападнік клуба Бабур Абдыхалікаў з 26 галамі стаў найлепшым бамбардзірам чэмпіянату.

2023

У пачатку 2023 года клуб пакінула значная колькасць ігракоў, якія былі лідарамі каманды ў мінулым годзе, яны перайшлі ў больш статусныя клубы. Сезон каманда пачала няўпэўнена і хутка апынулася ў ніжняй палове табліцы. 11 мая 2023 года па выніках справы па дагаварным матчам клуб быў пакараны: пазбаўлены сярэбраных медалёў 2022 года, 20 ачкоў у чэмпіянаце 2023 года і 10 ачкоў у чэмпіянаце 2024 года, атрымаў штраф; дыскваліфікацыі і штрафы таксама атрымалі прадстаўнікі клуба Анатоль Юрэвіч і Арам Абд-аль-Маджыд. У той жа дзень клубу было адмоўлена ў атрыманні ліцэнзіі УЕФА, з-за чаго ён быў пазбаўлены права ўдзельнічаць у Лізе канферэнцый. 22 мая 2023 года «Энергетык-БДУ» быў пазбаўлены яшчэ 3 ачкоў у чэмпіянаце 2023 года. У выніку штрафаў каманда апынулася ў канцы табліцы, дзе змагалася з іншымі аштрафаванымі клубамі — салігорскім «Шахцёрам» і бабруйскай «Белшынай». Прапусціўшы наперад «Шахцёр», сталічны клуб пэўны час знаходзіўся на апошнім радку, і толькі перамога ў апошнім туры дазволіла «Энергетыку-БДУ» абысці «Белшыну» і заняць перадапошняе месца. Пасля паражэння ў стыкавых матчах ад «Віцебска» каманда апусцілася ў Першую лігу.

Эмблемы

• Гісторыя эмблем «Энергетыка-БДУ»
• 
  Эмблема «Зоркі-БДУ» да 2016 года
• 
  Эмблема «Энергетыка-БДУ» ў 2017—2018 гадах
• 
  Эмблема «Энергетыка-БДУ» ў 2019—2021 гадах
• 
  Эмблема «Энергетыка-БДУ» з 2022 года

Папярэднія назвы

• 1996—1997: «Зорка»
• 1998—2004: «Зорка-ВА-БДУ»
• 2005—2016: «Зорка-БДУ»
• з 2017: «Энергетык-БДУ»

Дасягненні

• 02 Сярэбраны прызёр чэмпіянату Беларусі: 2022
• Пераможца Другой лігі чэмпіянату Беларусі: 1998 (група А)
• Паўфіналіст Кубка Беларусі: 2006

Цяперашні склад

Станам на жнівень 2024 года.

№ Паз. Імя Нар. 1 Бр Канстанцін Вератынскі 2006 13 Бр Дзяніс Селядцоў 2003 22 Бр Вадзім Казлоўскі 2005 Бр Уладзіслаў Мацкевіч 2006 2 Аб Раман Кебікаў 2006 3 Аб Фёдар Федаровіч (у арэндзе з «Мінска») 2006 4 Аб Ілья Казакоў 2005 12 Аб Яўген Война 2000 25 Аб Арцём Саковіч (у арэндзе з «Мінска») 2006 26 Аб Мацвей Барысевіч 2003 27 Аб Мікіта Салановіч (у арэндзе з «Белшыны») 2005 Аб Арсеній Сокал 2005 6 ПА Іван Агееў 2005 8 ПА Міраслаў Тамковіч 2006

№ Паз. Імя Нар. 11 ПА Максім Пашкевіч 2002 16 ПА Віктар Лісоўскі (у арэндзе з «Дынама» Мінск) 2005 19 ПА Ягор Лукашэнка 2005 20 ПА Магамед Тагаеў 2003 21 ПА Дзяніс Ссорын 2004 23 ПА Уладзіслаў Ганчук (у арэндзе з «Мінска») 2006 24 ПА Арсеній Вайнер 2001 28 ПА Вадзім Ссорын 2004 7 Нап Амірбек Бакаеў 2004 9 Нап Даніла Чуль (капітан) 2005 14 Нап Мікіта Бабчонак 1999 17 Нап Артур Старавойтаў 2004 18 Нап Аляксандр Жлобіч 2007 29 Нап Данііл Лясько 2007

Трэнерскі штаб

• Аляксей Мяркулаў (нар. 1972) — галоўны трэнер
• Мікалай Бранфілаў (нар. 1977) — трэнер
• Аляксандр Шагойка (нар. 1980) — трэнер
• Артур Лясько (нар. 1984) — трэнер брамнікаў
• Анатоль Юрэвіч (нар. 1957) — трэнер-кансультант

Статыстыка выступленняў

Чэмпіянат і Кубак Беларусі

Сезон	Ліга	М	Г	В	Н	П	Галы	Ачкі	Кубак	Заўвагі
1996	Трэцяя — Б (Д3)	3	26	17	4	5	63–24	55
1997	Трэцяя — А (Д3)	4	26	14	5	7	56–38	47		Змена назваў ліг
1998	Другая — А (Д3)	1	26	18	2	6	67–27	56	1/8 фіналу	Выхад у Першую лігу
1999	Першая (Д2)	12	30	8	9	13	38–57	33
2000	Першая (Д2)	4	30	15	7	8	47–35	52	1/16 фіналу
2001	Першая (Д2)	2	28	19	5	4	74–21	62	1/16 фіналу	Выхад у Вышэйшую лігу
2002	Вышэйшая (Д1)	12	26	4	6	16	28–48	18	1/8 фіналу
2003	Вышэйшая (Д1)	12	30	7	4	19	23–64	25	1/16 фіналу
2004	Вышэйшая (Д1)	13	30	7	8	15	31–56	29	1/16 фіналу
2005	Вышэйшая (Д1)	13	26	3	5	18	24–60	14	Паўфінал	Вылет у Першую лігу
2006	Першая (Д2)	12	26	5	10	11	32–39	25	1/16 фіналу
2007	Першая (Д2)	14	26	2	4	20	17–58	10	1/16 фіналу	Вылет у Другую лігу
2008	Другая (Д3)	4	30	15	8	7	59–28	53	1/16 фіналу
2009	Другая (Д3)	7	26	11	6	9	40–34	39	1/16 фіналу
2010	Другая (Д3)	5	34	15	10	9	76–47	55	1/32 фіналу
2011	Другая (Д3)	8	30	12	6	12	40–32	42	1/32 фіналу
2012	Другая (Д3)	7	36	18	4	14	54–41	58	1/16 фіналу
2013	Другая (Д3)	3	24	14	7	3	45–16	49	1/16 фіналу	Атрыманне месца ў Першай лізе
2014	Першая (Д2)	9	30	12	4	14	50–48	40	1/8 фіналу
2015	Першая (Д2)	10	30	10	10	10	47–47	40	1/32 фіналу
2016	Першая (Д2)	10	26	9	6	11	33–41	33	1/16 фіналу
2017	Першая (Д2)	6	30	12	8	10	39–30	44	1/32 фіналу
2018	Першая (Д2)	2	28	21	4	3	69–23	67	1/16 фіналу	Выхад у Вышэйшую лігу
2019	Вышэйшая (Д1)	12	30	8	9	13	52–66	33	1/8 фіналу
2020	Вышэйшая (Д1)	10	30	11	5	14	43–46	38	1/8 фіналу
2021	Вышэйшая (Д1)	13	30	8	9	13	35–42	33	1/8 фіналу
2022	Вышэйшая (Д1)	2	30	18	6	6	50–27	60	1/8 фіналу
2023	Вышэйшая (Д1)	14	28	7	6	15	25–42	4	1/16 фіналу
	Пераходныя матчы		2	0	1	1	0–1			Вылет у Першую лігу

Галоўныя трэнеры

• Уладзімір Пігулеўскі (з 1996)
• Міхаіл Мархель (2000—2001)
• Юрый Антановіч (2002—2003)
• Уладзімір Касакоўскі (2004)
• Сяргей Гоманаў (в. а. у студзені — ліпені 2005)
• Юрый Антановіч (2005—2007)
• Сяргей Гоманаў (2008—2010)
• Юрый Антановіч (2010—2011)
• Анатоль Шкляр (2013—2016)
• Уладзімір Бяляўскі (2017 — люты 2022)
• Павел Раднёнак (люты 2022 — май 2023)
• Аляксей Мяркулаў (з мая 2023)

Спасылкі

• Профіль на сайце globalsportsarchive.com (англ.)
• Профіль на сайце wildstat.ru (руск.)