Вікіпедыя:Апостраф

Апошнім часам пад уплывам камп’ютарнай тэхнікі і іншых моў у беларускіх тэкстах часта змяняюць і няслушна ўжываюць некаторыя друкарскія сімвалы, у прыватнасці — апостраф. Традыцыйны апостраф, які ўжываюць у друкаваных выданнях, а таксама ўжыты ў Правілах беларускай арфаграфіі і пунктуацыі (2008) — друкарскі апостраф (’, U+2019). З тэхнічнага боку выкарыстанне ў Вікіпедыі друкарскага апострафа магчыма і не стварае дадатковых цяжкасцяў у функцыянальнасці праекта, затое робіць тыпаграфіку раздзела адпаведнай традыцыям беларускай мовы. Разам з тым машынапісны апостраф (', U+0027) да часу з’яўлення камп’ютарнага набору для беларускай мовы быў нехарактэрны наогул. На гэтых падставах, прымаюцца наступныя правілы па выкарыстанні апострафа:

У назвах артыкулаў як апостраф варта ўжываць друкарскі апостраф «’» (код U+2019, на клавіятуры — Alt+0146), а не машынапісны апостраф «'» (код U+0027, на клавіятуры — Alt+39) або «ʼ» (U+02BC). Таксама пажадана рабіць перасылкі з варыянту з машынапісным апострафам на варыянт з друкарскім апострафам.

У тэксце ж артыкулаў выкарыстанне машынапіснага апострафа не раўназначна граматычнай памылцы, а прыблізна адпавядае недакладнаму фарматаванню артыкула. Калі ўдзельнік па тых ці іншых прычынах не можа пісаць з друкарскім апострафам або свабодна распаўсюджаны тэкст змяшчае машынапісныя апострафы, то дапушчальна пакінуць артыкулы з машынапісным апострафам. Артыкул потым можа выправіць іншы ўдзельнік, уручную або з дапамогай тэхнічных сродкаў, такіх як вікіфікатар.

Замена карэктна пастаўленага друкарскага апострафа на машынапісны ва ўжо існых артыкулах недапушчальна.